Astanadaǵy turǵyn úi keshenderiniń birindegi balalar alańynyń áskeri taqyrypta bezendirilýi áleýmettik jeli qoldanýshylarynyń synyna ushyrady. Oiyn kesheninde qarýly sarbazdar, áskeri tikushaqtar men ushaqtardyń sýretteri beinelengen, dep habarlaidy dalanews.kz.
Threads áleýmettik jelisinde didar_toledo esimdi qoldanýshy Astanadaǵy «Shar Qurylys» turǵyn úi kesheninde ornalasqan oiyn alańynyń sýretterin jariialaǵan. Ol balalar kún saiyn soǵysqa qatysty sýretterdi kórýge májbúr bolýy kerek pe degen suraq qoiǵan.
Jariialanǵan fotolardan oiyn kesheniniń qabyrǵalaryna áskeri taqyryptaǵy sýretter salynǵanyn kórýge bolady. Bir panelde qolyna qarý ustaǵan áskeri adam, onyń artynda áskeri tehnika men jarylys kórinisteri beinelengen. Basqa bólikterinde jaýyngerlik tikushaqtar men ushaqtardyń sýretteri bar.
Jazbaǵa pikir qaldyrǵandar mundai bezendirýdi synǵa aldy. Keibiri balalar oinaityn ortanyń áskilenýine alańdasa, endi biri ushaqtardyń artyndaǵy aq, kók jáne qyzyl tústi izderge nazar aýdaryp, ony Resei týynyń tústerimen bailanystyrǵan.
Alaida oiyn keshenine mundai sýretterdi kim tańdaǵany jáne ony ornatýǵa kim jaýapty bolǵany jariialanǵan materialdarda kórsetilmegen.
