Atyraý oblysyndaǵy Jangeldin aýylynda bolǵan qaiǵyly oqiǵadan aman qalǵan Aqbaian Muqanǵalieva alǵash ret jýrnalisterge suhbat berdi. Qazir týystarynyń qamqorlyǵynda júrgen bes balanyń anasy densaýlyǵyn qalpyna keltirýge tyrysyp jatyr. Onyń eń úlken armany – balalarymen qaita qaýyshý, dep dalanews.kz tilshisi KTK telearnasyna silteme jasap habarlaidy.
Jangeldindegi qaiǵyly oqiǵadan keiin Aqbaian Muqanǵalievanyń taǵdyry kópshilikti alańdatqan edi. Qazirgi ýaqytta ol jaqyndarynyń qoldaýymen ońaltý sharalarynan ótip jatyr.
Telearna málimetinshe, áieldiń bes balasy balalar úiinde tárbielenýde. Aqbaian olarǵa apta saiyn baryp, jaǵdailaryn bilip turady.
Týystary sońǵy ýaqytta onyń jaǵdaiynda oń ózgerister baiqalǵanyn aitady. Buryn kóp ýaqytyn uiqymen ótkizgen Aqbaian qazir ainalasyndaǵylarmen sóilesip, kúndelikti ómirge birtindep beiimdele bastaǵan.
"Ata-anasy men baýyrlaryn jii suraidy"
Aqbaiannyń jaqyndarynyń aitýynsha, ol burynǵy ómirindegi kóptegen oqiǵany esine túsire alady. Aǵaiyndaryn tanidy, balalaryn biledi. Alaida ómiriniń belgili bir kezeńindegi oqiǵalardy eske túsirýde qiyndyqtary bar.
Sońǵy ýaqytta ol týǵan aýylyna barǵysy keletinin aityp, ata-anasy men baýyrlarynyń qaida ekenin jii surai bastaǵan.
Týystary ázirge oǵan otbasynyń basyna túsken qaiǵyny tolyq aitýǵa daiyn emes. Olar mundai habardyń Aqbaiannyń qazirgi jaǵdaiyna qalai áser etetininen alańdaidy.
"Qaida, aýylda ma?" dep suraidy. Aýylǵa birjola barǵysy keledi. Baýyrlaryn suraǵanda, Túrkiiada degen ǵoi. "Qoi, Shalqar degen aitty ǵoi, aýylda dep aitty ǵoi, aparam dep aitty ǵoi" deidi. Áli daiyn emes degen, sondyqtan aitpai júrmiz. Aitqan jaǵdaidyń ózinde qandai kúide bolady, qaityp aýyrtyp alamyz ba degen siiaqty ǵoi endi. Kúteiik endi, aiaǵyna turyp alsyn degenge keltirip turmyz endi", – deidi Aqbaiannyń ápkesi Ásila Muqanǵalieva.
"Kishkentaiym alyp ketshi dep jylaidy"
Aqbaian Muqanǵalieva jýrnalistermen áńgimesinde balalary týraly da aitty.
Ol bes balasynyń árqaisysynyń esimi men týǵan jylyn biletinin jetkizdi. Qazir olarmen kezdesip turady, alaida balalaryn ózimen birge alyp ketýge ázirge múmkindigi joq.
"Kishkentaiy jylaidy, "alyp ketshi" dep. Úlkenderi endi túsinedi", – dedi Aqbaian.
Áieldiń aitýynsha, densaýlyǵyn qalpyna keltirý úshin psihologtyń kómegine júginip júr.
Jýrnalistiń qazirgi jaǵdaiy týraly suraǵyna ol bylai jaýap bergen:
"Iá, psihologqa baryp júrmin. Tańerteń, aptasyna eki ret. Basqa eshqaida qaralyp jatqan joqpyn. Basym mazalasa, ketedi ǵoi. Biraq qatty aýyryp júrgem joq", – dedi ol.
Aqbaian besinshi balasyn dúniege ákelgennen keiin densaýlyǵyna bailanysty ota jasalǵanyn aityp, sol kezeńnen keiingi kóptegen jaǵdaidy umytyp qalǵanyn jetkizgen.
Degenmen onyń naqty diagnozy týraly dárigerlerdiń resmi qorytyndysy jariialanbaǵan.
Týystary Aqbaiandy Almaty nemese Astanaǵa aparýdy josparlap otyr
Aqbaiannyń aǵasy Shalqar Muqanǵaliev qaryndasynyń jaǵdaiynda ilgerileý bar ekenin aitty. Alaida otbasy ońaltý jumystaryn toqtatpai, ony tájiribeli mamandarǵa qaratýdy qalaidy.
Jaqyndary Aqbaiannyń ómirge degen qyzyǵýshylyǵyn qaita oiatyp, balalaryn tárbieleýine jaǵdai jasaýdy basty maqsat sanaidy.
"Aqbaiannyń ómirge degen qulshynysy joǵalǵan. Sol qulshynysty basynan qaita oiatý kerek. Bizdiń aldaǵy úmitimiz – bes balasyn alyp, ózi baqytty ómir súrse degen niet. Nátijesin kórip, aiaqtan turyp kele jatqanyn kórgennen keiin, osy toqtap qalmasyn, ári qarai dami bersin deimiz", – dedi Shalqar Muqanǵaliev.
Onyń sózinshe, týystary Aqbaiandy Almaty nemese Astana qalalaryndaǵy bilikti dárigerlerge kórsetýdi de qarastyryp jatyr.
Alaida bul úshin qosymsha qarjy qajet.
"Bálkim Atyraýda keibir qaralmaǵan nárseni, bálkim Almaty, Astanaǵa shyǵyp, sol jaqtaǵy myqty dárigerlerge qaratamyz ba degen oiymyz bar. Ol jaqqa aparý úshin bizge qalai bolǵanda da qarajat kerek. Ol qarajat ózimizden múmkin emes boldy", – dedi aǵasy.
Sondyqtan otbasy Aqbaiannyń emin jalǵastyrý úshin kópshilikten qarjylai kómek suraýǵa májbúr bolǵan.
