Qazaqstandyq oligarh, eks-prezident Nursultan Nazarbaevtyń kúieý balasy Timýr Qulybaev Londondaǵy záýlim úiin 34,7 million fýnt sterlingke satty, dep habarlaidy Dalanews.kz.
“Bailyǵy 5 milliard fýnt sterlingke baǵalanǵan qazaqstandyq oligarh Londondaǵy úiin nebári 35 million fýnt sterlingke North Wind Capital investitsiialyq kompaniiasyna satty”, - dep jazady Financial Times basylymy.
Materialda úidiń bai-aýqattylar turatyn Meifer aýdanyndaǵy Upper Grosvenor street 41 mekenjaiynda ornalasqany naqtylanǵan. Satyp alýshy - Deutsche Bank-tiń jyljymaityn múlik salasy boiynsha erekshe jaǵdai jónindegi bólimniń burynǵy direktory Ben Ýiliams negizin qalaǵan North Wind Capital investitsiialyq kompaniiasy. Olar úidi qaita qurýdy josparlap otyr.
Basylymnyń jazýynsha, Qulybaev Apper-Grosvenor-strit mekenjaiynda boi kótergen kórshi úilerdi de satýy múmkin. Olar Býkingem saraiynan birneshe minýttyq jerde ornalasqan. Oligarh bularǵa jiyrma jylǵa jýyq ýaqyt ielik etip keledi. Osy ýaqyt ishinde ol satqan úiler negizinen bos turǵan-mys.
Eske salaiyq, buǵan deiin májilis depýtaty Ermurat Bapi quzyrly organdar Timýr Qulybaevtyń sheteldegi aktivterin qaitarýmen ainalysyp jatqanyn málimdegen edi.
"Shynymdy aitsam, aktivterdi qandai ádispen qaitaryp jatqanynan beihabarmyn. Ekinshiden, depýtat retinde prezident júrgizip otyrǵan saiasatqa ziian keltirýim múmkin. Áńgime eski Qazaqstan ókilderiniń jan-jaǵyndaǵy adamdarǵa, iaǵni Nursultan Nazarbaevqa qatysty bolsa, prezident Toqaev pen eks-prezident arasynda keibir niýanstar, kelisimder bolǵan shyǵar. Nazarbaev myrza 2019 jyly 19 naýryzda ketken kezde sol kezde bir kelisimder bolǵan shyǵar. Onyń ústine Reseidiń, Pýtinnniń yqpalyn da eskerý kerek", - deidi Ermurat Bapi Elmedia-ǵabergen suhbatynda.
Sonymen qatar, Ermurat Bapi bas prokýror Berik Asylovtyń otstavkaǵa ketý ne ketpeýi týraly oiyn aitty.
"Bas prokýrordy otstavkaǵa jiberý nemese taǵaiyndaý prezidenttiń quzyrynda. Tipti parlament bas prokýrordy taǵaiyndaýǵa aralaspaidy. Sondyqtan el prezidenti batyl áreket etýi kerek. Eń mańyzdy saiasi sheshim bolýy kerek. Al Bas prokýrordyń jumysyna aitylar syn kóp. Mende bas prokýratýra tarapynan jariialaýǵa jatpaityn ister bar degen aqparat bar. Biraq aktivterdi qaitarý boiynsha komitet bas prokýrorǵa baǵynatyndyqtan qoǵam tarapynan syn bas prokýrorǵa aitylady. Depýtattar aktivterdi qaitarý týraly zańnyń basy-qasynda júrgendikten, ol zańnyń oryndalýyn da qadaǵalaý kerekpiz. Tipti bas prokýratýradan esep suraýymyz kerek. Biraq artyq aqparat joq, bári jasyryn istelip jatyr. Aktivterdi qaitarýǵa kim óz erkimen kelisti? Qansha aktiv qaitaryldy? Munyń bári halyqtan jasyryn ustalyp otyr", - deidi depýtat.
