Shymkenttik tártip saqshylary qýatty bomba jarylysy bolatyndyǵy týraly jalǵan aqparat taratqan eki áieldi ustady, dep habarlaidy QR IIM baspasóz qyzmeti.
Ishki ister organdary ustalǵandarǵa qatysty QR QK 247-baby 1-bóligi boiynsha sotqa deiingi tergeý amaldaryn júrgizip jatyr. Sońǵy táýlikte atalǵan bap boiynsha úsh qylmystyq is qozǵalǵan.
«QR IIM turǵyndardy áleýmettik jeliler men túrli messendjerler arqyly taralatyn jalǵan aqparatqa senbeýdi jáne úreige boi aldyrmaýdy suraidy. Resmi aqparat turaqty túrde arnaiy qurylǵan jedel shtab arqyly taralady», - dep habarlady vedomstvodan.
Sonymen birge, QR Ishki ister ministrligi Arys qalasynda qaitys bolǵan adamdardyń sany úsheý ekendigin resmi túrde rastady.
"Ministrlik áleýmettik jeli arqyly qaitys bolǵan adamdar sany odan da kóp degen qaýeset aqparattardyń jalǵan ekendigin málimdeidi. Eger de azamattar zardap shekken adamdar týraly qandai da bir qosymsha derekterge ie bolsa, resmi túrde ishki ister ministrligine shaǵymdanýǵa shaqyramyz", – dedi IIM-nen.
Aita keteiik, Arystaǵy apat týraly resmi aqparat turaqty túrde arnaiy qurylǵan jedel shtab arqyly taralýda.
Buǵan deiin de, Arysta joiqyn jarylys bolatyny týraly aqparat taratyp, dúrbeleń týǵyzǵan bir adam tutqyndalǵan bolatyn. Shymkent qalalyq Politsiia departamentiniń habarlaýynsha, qaladaǵy evakýatsiialyq beketterdiń birinde Arys qalasynyń turǵyny «Arysta qýatty bomba jarylyp, Shymkentke jetedi» degen habarlamany estip, sol jerdegi adamdarǵa taratqan.
