شىمكەنتتىك ءتارتىپ ساقشىلارى قۋاتتى بومبا جارىلىسى بولاتىندىعى تۋرالى جالعان اقپارات تاراتقان ەكى ايەلدى ۇستادى، دەپ حابارلايدى ق ر ءىىم باسپا ءسوز قىزمەتى.
ىشكى ىستەر ورگاندارى ۇستالعاندارعا قاتىستى ق ر قك 247-بابى 1-بولىگى بويىنشا سوتقا دەيىنگى تەرگەۋ امالدارىن جۇرگىزىپ جاتىر. سوڭعى تاۋلىكتە اتالعان باپ بويىنشا ءۇش قىلمىستىق ءىس قوزعالعان.
«ق ر ءىىم تۇرعىنداردى الەۋمەتتىك جەلىلەر مەن ءتۇرلى مەسسەندجەرلەر ارقىلى تارالاتىن جالعان اقپاراتقا سەنبەۋدى جانە ۇرەيگە بوي الدىرماۋدى سۇرايدى. رەسمي اقپارات تۇراقتى تۇردە ارنايى قۇرىلعان جەدەل شتاب ارقىلى تارالادى»، - دەپ حابارلادى ۆەدومستۆودان.
سونىمەن بىرگە، ق ر ىشكى ىستەر مينيسترلىگى ارىس قالاسىندا قايتىس بولعان ادامداردىڭ سانى ۇشەۋ ەكەندىگىن رەسمي تۇردە راستادى.
"مينيسترلىك الەۋمەتتىك جەلى ارقىلى قايتىس بولعان ادامدار سانى ودان دا كوپ دەگەن قاۋەسەت اقپاراتتاردىڭ جالعان ەكەندىگىن مالىمدەيدى. ەگەر دە ازاماتتار زارداپ شەككەن ادامدار تۋرالى قانداي دا ءبىر قوسىمشا دەرەكتەرگە يە بولسا، رەسمي تۇردە ىشكى ىستەر مينيسترلىگىنە شاعىمدانۋعا شاقىرامىز"، – دەدى ىىم-نەن.
ايتا كەتەيىك، ارىستاعى اپات تۋرالى رەسمي اقپارات تۇراقتى تۇردە ارنايى قۇرىلعان جەدەل شتاب ارقىلى تارالۋدا.
بۇعان دەيىن دە، ارىستا جويقىن جارىلىس بولاتىنى تۋرالى اقپارات تاراتىپ، دۇربەلەڭ تۋعىزعان ءبىر ادام تۇتقىندالعان بولاتىن. شىمكەنت قالالىق پوليسيا دەپارتامەنتىنىڭ حابارلاۋىنشا، قالاداعى ەۆاكۋاسيالىق بەكەتتەردىڭ بىرىندە ارىس قالاسىنىڭ تۇرعىنى «ارىستا قۋاتتى بومبا جارىلىپ، شىمكەنتكە جەتەدى» دەگەن حابارلامانى ەستىپ، سول جەردەگى ادامدارعا تاراتقان.
