Áielin uryp óltirdi dep kúdikke ilingen eks-ministr Qýandyq Bishimbaevtyń isi qoǵam nazaryn aýdaryp, kópshiliktiń talqysyna túskeni ras. Tipti áleýmettik jelide bul iske qatysty pikir ekige jaryldy.
Biri sheneýnikti "jerden alyp, jerge salyp jatsa", endi biri onyń áreketine ekinshi jaqtan qarap, "aqtaýǵa" tyrysýda, dep jazady Dalanews.kz.
Máselen, buǵan deiin jýrnalist Syrym Itqulov jelide burynǵy ministr Ermuhamet Ertisbaevty Bishimbaevty qoldaýǵa qatysy bar adamdardyń biri retinde atap ótken. Onyń sózinshe, qoǵamda eks-sheneýnikti aqtap alý naýqany qarqyndy túrde júre bastaidy.
"Qazir bári sot bastalar aldynda jáne sot otyrystary barysynda mediada Qýandyq Bishimbaevty aqtaý boiynsha kezekti naýqan bastalatynyn kórsetip otyr. Esterińizde bolsa, ol byltyr ustalǵannan keiin de birden osyndai boldy. Sottalýshynyń týystary bir nemese birneshe piar-agenttikti tartqany aidan anyq. Qýandyq óz eliniń patrioty, úlgili otaǵasy jáne kóptegen til biletin "qarapaiym jaqsy jigit" ekeni aitylatyn túrli jazbalar kóbeiip ketti. Olardyń keibireýleri tipti sheteldik basylymdarda da shyqty.Eń soraqysy, bulardyń qaitys bolǵan adamdy qaralaýǵa tyrysqany. Olar onyń (Saltanattyń, red.) qatty mas bolǵanyn, tabletkalardy qabyldaǵanyn jarysa jazdy", - degen edi Itqulov.
Bul pikirdi saiasatker Muhtar Taijan da quptaidy. Ol Qýandyq Bishimbaev ákesi uiymdastyrǵan piardyń arqasynda jazadan qutylyp ketýi múmkin ekenin aitady.
"Bul iske Bishimbaevtyń ákesi, akademik, laýreat, eńbek sińirgen qairatker, rektor jáne Nur-Otan partiiasynyń depýtaty, Nazarbaevtyń dosy Ýálihan Bishimbaevty kináli dep sanaimyn. Sebebi ol memlekettiń qarjysyn jymqyrǵan uryny tárbieledi. Bul sotpen dáleldendi. Nazarbaev arqyly ol ulyna keshirim berýin suraǵanyna senimdimin. Sondyqtan iri qylmysker bostandyqqa shyǵyp, jazalanbaitynyna senimdi boldy. Bunyń arty úlken tragediiaǵa ákeldi. Qazir kishi Bishimbaev áieli Saltanat Núkenovany erekshe qatygezdikpen óltirdi degen kúdikke ilindi. Endi mine, ákesi BAQ arqyly ulyn aqtap shyǵýǵa tyrysyp jatyr. Tipti balasynyń áreketine bailanysty ókinetinin jetkizgen sózi de joq. Eger sot Qýandyqtyń kinásin dáleldese, ákesin de barlyq ataǵynan aiyrýdy talap etýimiz qajet", - dep jazǵan edi Taijan.
Sonymen qatar "Bishimbaevty aqtap alý protsesi bastalyp ketti" dep bala quqyqtary jónindegi ýákil Dinara Zákieva da dabyl qaqqan. Ol marqum Saltanat Núkenovanyń isi boiynsha sotqa deiin nemese sot protsesinde "sottalýshyny aqtaý úshin faktilerdi qasaqana burmalaýǵa áreket jasalýy múmkin" degen maǵynada alańdaýshylyq tanytyp, jazba qaldyrdy.
"Keibir adamdar atalmysh media naýqanǵa kirisip ketti. Buǵan adamdardyń qalai qatysa alatynyn, zorlyq-zombylyqty qalai aqtaýǵa bolatynyn túsiný múmkin emes. Atalǵan is boiynsha ádil sot jazadan qutylý múmkin emestigi týraly naqty signal bolýy tiis", – dep pikirin bildirdi Bala quqyqtary jónindegi ýákil.
Bul oqiǵany negizge alǵan qoǵam belsendileri atalmysh másele jyly jabylyp, kúdikti jazadan qutylyp ketpese eken dep alańdaýshylyq tanytýda. Sebebi sońǵy kúnderi BAQ betinde Bishimbaevty jaqtaýshylardyń tóbesi jii kórine bastady.
Mysaly, jýrnalist Gúljan Erǵalievamen bolǵan suhbatta Saltanat Núkenovany uryp óltirdi dep aiyptalyp túrmede otyrǵan Bishimbaevtyń advokattary Nazken Qusaiynova men Leila Ramazanova aiyptalýshy taraptyń ýájin aityp, kúdikti kinásin moiyndamaitynyn jáne Núkenovanyń sýbdýraldy gematomadan qaitys bolǵanyn jetkizdi.
Sonymen qatar olar marqumnyń denesinde buryn bolǵan jaraqattan kóz jumǵanyn meńzeidi. Qala berdi olar Bishimbaevtyń áielin áli kúnge deiin jaqsy kóretinin jáne qatty qaiǵyratynyn basa aitqan bolatyn.
Osynaý daýly iske bailanysty jýrnalist Gúlbaný Ábenova, qazaqtildi blogerler Lázzat Ahatova, Sáýle Ábildahanqyzy da jelide óz pikirin bildirgen.
Aitalyq, Ábenova Bishimbaevtyń otbasyna qarsy agressiialyq pikir jazatyn bottar paida bolǵanyn jáne advokattardyń suhbaty oqiǵanyń ekinshi jaǵyn ashyp bergenin jetkizgen. Ol halyqty “ózderi senetin shyndyqty buzǵysy kelmeidi” dep aiyptaǵan.
“Múmkin Bishimbaev shynymen óltirmegen shyǵar. Al azamattyq nekedegi áieli gematomanyń saldarynan qan ketýden uiyqtap jatqanda qaitys bolýy da múmkin ǵoi", – dep óz oiyn ortaǵa salǵan bolatyn.
Tanymal jýrnalist Gúljan Erǵalieva men saiastatker Ermuhamet Ertisbaevtyń sóz saryny da osyǵan saiǵan edi.
Qoǵamda týyndaǵan osyndai eki jaqty pikirge bailanysty telegram-arnalarda ártúrli aqparat taraýda.
Olardyń málimetinshe, qazirgi ýaqytta E.Ertisbaev, G.Ábenova, G.Erǵalieva jáne birqatar qazaqtildi blogerler otbasynan arnaiy "qalamaqy" alǵan bolýy múmkin.
Osy tusta olar Bishimbaevti aqtap, Núkenovanyń tabiǵi sebepten qaitys bolǵanyna aktsent beretin PR kompaniia qurylǵanyn alǵa tartady.
Tarap jatqan osynaý aqparattardyń anyq-qanyǵyn bilý úshin Dalanews.kz tilshisi jýrnalist Gúlbaný Ábenovaǵa ózine habarlasyp, mán-jaidy bildi. Ol óz tarapyna aitylyp jatqan pikirdi joqqa shyǵardy.
"Men qandai másele kótersem de kópshilik arnaiy tapsyrys dep oilaidy. Bul máseleni men úsh aidan beri jazyp kelemin. Bul ýaqytta eshkim meni qalamaqy alyp jatsyń dep aiyptamady. Sodan soń ekinshi jaqtyń (Bishimbaevtyń, red.) advokattary shyqty. Buǵan deiin men ekinshi taraptyń tergeý nátijesi boiynsha pikir bildirmei jatqanyn suraǵan bolatynmyn. Al Bishimbaevtyń advokatttarynyń sózine bailanysty pikir bildirgennen keiin maǵan bári birden qalamaqy aldy dep aiyp taǵýdy bastady.
Maǵan eshqandai qalamaqy tólenbedi. Sonda osyndai túrli alyp-qashpa áńgimelerge sene beresizder me? Qandai másele bolsa da eki jaqtan qaralýy kerek.
Núkenovter de perishte emes. Maǵan kúnde olarǵa qatysty jan-jaqtan túrli aqparat kelip jatyr", - dep sózin qorytyndylady jýrnalist.
