Saltanat Núkenovanyń sińlisi sotta kýáger bolyp, Núkenovanyń ólimi týraly habardy qalai estigenin aitty,- dep habarlaidy Dalanews.kz.
"Ol kezde dýshta edim. Naqtylaý úshin aita salaiyn, basym sý bolyp tur. Ulym dýshqa atyp kirip, telefonyma toqtaýsyz qońyraý túsip jatqanyn aitty.
Baqytjan (Baijanov) "nege tutqany kótermei jatyrsyń? Saltanat qaitys boldy" dedi. Men, árine, senbedim. Taǵy bireý habarlasyp "Ainur, imandy bolsyn" deidi. Aitym (Núkenovanyń aǵasy) habarlasyp "BAU-ǵa kelshi" dedi. Sý basymmen kólikke otyrdym, kúieýim "Qýandyq Saltany óltirdi" dedi. Men senbedim", - deidi Saltanattyń sińlisi.
Buǵan deiin Bishimbaev Saltanatqa qandai dárini ne úshin bergenin aitqan bolatyn.
Sonymen qatar,Núkenovanyń aǵasy sotta Bishimbaevqa suraq qoidy.
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Sot otyrystarynda oqiǵa bolǵan kezdiń, dálirek, Bishimbaev Saltanatty shashynan súirep, tepkilegen sumdyq kadrlar kórsetildi.
Al búgin Qýandyq Bishimbaev Saltanat Núkenova qaitys bolǵan túni ne úshin kóripkelge habarlasqanyn túsindirdi. Onyń sózinshe, qaiǵyly oqiǵa bolǵan túni jedel járdem shaqyrýdyń ornyna habarlasqan kóripkel Shymkentte turady.
