سالتانات نۇكەنوۆانىڭ ءسىڭلىسى سوتتا كۋاگەر بولىپ، نۇكەنوۆانىڭ ءولىمى تۋرالى حاباردى قالاي ەستىگەنىن ايتتى،- دەپ حابارلايدى Dalanews.kz.

"ول كەزدە دۋشتا ەدىم. ناقتىلاۋ ءۇشىن ايتا سالايىن، باسىم سۋ بولىپ تۇر. ۇلىم دۋشقا اتىپ كىرىپ، تەلەفونىما توقتاۋسىز قوڭىراۋ ءتۇسىپ جاتقانىن ايتتى.

باقىتجان (بايجانوۆ) "نەگە تۇتقانى كوتەرمەي جاتىرسىڭ؟ سالتانات قايتىس بولدى" دەدى. مەن، ارينە، سەنبەدىم. تاعى بىرەۋ حابارلاسىپ "اينۇر، يماندى بولسىن" دەيدى. ايتىم (نۇكەنوۆانىڭ اعاسى) حابارلاسىپ "BAU-عا كەلشى" دەدى. سۋ باسىممەن كولىككە وتىردىم، كۇيەۋىم "قۋاندىق سالتانى ءولتىردى" دەدى. مەن سەنبەدىم"، - دەيدى سالتاناتتىڭ ءسىڭلىسى. 

بۇعان دەيىن بيشىمبايەۆ سالتاناتقا قانداي ءدارىنى نە ءۇشىن بەرگەنىن ايتقان بولاتىن. 

سونىمەن قاتار،نۇكەنوۆانىڭ اعاسى سوتتا بيشىمبايەۆقا سۇراق قويدى.

ايتا كەتەيىك، 27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.

سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.

سوت وتىرىستارىندا وقيعا بولعان كەزدىڭ، دالىرەك، بيشىمبايەۆ سالتاناتتى شاشىنان سۇيرەپ، تەپكىلەگەن سۇمدىق كادرلار كورسەتىلدى.

ال بۇگىن قۋاندىق بيشىمبايەۆ سالتانات نۇكەنوۆا قايتىس بولعان ءتۇنى نە ءۇشىن كورىپكەلگە حابارلاسقانىن ءتۇسىندىردى. ونىڭ سوزىنشە، قايعىلى وقيعا بولعان ءتۇنى جەدەل جاردەم شاقىرۋدىڭ ورنىنا حابارلاسقان كورىپكەل شىمكەنتتە تۇرادى.