QR Premer-mınıstriniń birinshi orynbasary Roman Sklárdy aımaq basshysy Nurlybek Nálibaev «Qorqyt Ata áýejaıynyń» jańa termınalynyń jumysymen tanystyrdy, - dep habarlaıdy Dalanews.kz.
«Memleket basshysy Qasym-Jomart Kemelulynyń tapsyrmasymen, Qazaqstan Respýblıkasynyń Premer-mınıstri Oljas Abaıulynyń qatysýymen 2024 jyly 12 qarashada «Qorqyt Ata áýejaıynyń» jańa termınaly ashyldy. Jobany iske asyrýǵa «Bolat Ótemuratov qory» 16,6 mlrd teńge ınvestısıa saldy, jergilikti búdjetten ınjenerlik-kommýnıkasıalyq ınfraqurylymǵa 4,3 mlrd teńgeden astam qarajat bólindi»,– dedi N.Nálibaev.
Áýe aılaǵynyń ótkizý múmkindigi 7 ese, ıaǵnı jylyna 300 myńnan 2 mln jolaýshyǵa deıin artty. Jańa termınal Halyqaralyq áýe kóligi qaýymdastyǵynyń (IATA) jáne Halyqaralyq azamattyq avıasıa uıymynyń (ICAO) joǵary standarttaryna sáıkes keledi.
Búginde «Qorqyt Ata áýejaıy» arqyly «AirAstana», «Fly Arystan» jáne «Qazaq Air» áýe kompanıalary aptasyna 26, atap aıtqanda Astana qalasyna 16, Almatyǵa 10 reıs oryndaýda.
Roman Sklár jańa termınal aımaqtyń áleýmettik-ekonomıkalyq damýyna, saýda-sattyq kóleminiń ósýine oń septigin tıgizetinin aıtty.
