2025 jylǵy 30 maýsymnan bastap Resei vizasyz rejimmen kiretin TMD elderi azamattary úshin mindetti onlain tirkeýdi engizedi. Qazaqstan azamattary, onyń ishinde 6 jastan asqan balalar, shekaradan ótýge deiin keminde 72 saǵat buryn RuID qosymshasyna tirkelip, saýsaq izderin tapsyrýy tiis. Migratsiialyq talaptardyń kúsheiýi "Atameken" QR Ulttyq kásipkerler palatasy tóralqasynyń Logistika jáne tasymaldaý komitetiniń Avtomobil kóligi jónindegi shaǵyn komitet otyrysynda talqylandy, dep habarlaidy Dalanews.kz.
Talqylaý qorytyndysy boiynsha UKP Syrtqy ister ministrligine logistika, saýda jáne jetkizýge tónetin qaýipterge bailanysty jańa talaptarǵa túsinikteme berý jaiynda resmi hat joldady. Qazaqstan Respýblikasynyń Resei Federatsiiasyndaǵy elshiliginiń jaýabynda 7 kúnnen keiin kúshine enetin negizgi ózgerister rastaldy.
Elshilik usynǵan aqparatqa sáikes, bul qadam – azamattardyń jáne azamattyǵy joq tulǵalardyń Reseige kirýi men shyǵýyna qatysty erejelerdi synaqtan ótkizý boiynsha memlekettik eksperimenttiń bir bóligi bolyp tabylady.
«2024 jylǵy 1 jeltoqsannan bastap Qazaqstan azamattary Máskeýdiń halyqaralyq áýejailaryna (Domodedovo, Sheremetevo, Vnýkovo, Jýkovskii) jáne Orynbor oblysyndaǵy Mashtakovo avtokólik ótkizý beketinde biometriialyq derekter – bet beinesi men saýsaq izderin tapsyrýy qajet. 2025 jylǵy 30 maýsymnan bastap bul protsedýra Resei memlekettik shekarasynan ótetin barlyq beketterge qoldanylady», – delingen resmi jaýapta.
Bul bizneske qalai áser etedi?
Resei naryǵymen belsendi jumys isteitin qazaqstandyq biznes úshin bul ózgerister eleýli qaýip tóndiredi. Jańa erejeler ásirese eksportqa baǵyttalǵan aimaqtardaǵy shaǵyn jáne orta bizneske tikelei áser etedi.
Máselen, júk jáne jolaýshy tasymalynda júrgizýshilerdi turaqty tirkeý qajettiligi týyndaidy. Bul ákimshilik shyǵyndardy arttyryp, marshrýttardy uiymdastyrýǵa ketetin ýaqytty kóbeitip, shekarada kidiristerge ákelýi múmkin. Sondai-aq, reseilik aýmaqtaǵy uzaqmerzimdi jobalarǵa qatysý qiynǵa soǵady (maýsymdyq jumystar nemese issaparlar).
Shekaradan ótý rásiminiń kúrdelenýi saýda-ekonomikalyq yntymaqtastyqqa da áser etýi múmkin: iskerlik mobildilik tómendep, kelissózder men iskerlik is-sharalarǵa qatysý azaiady, bul transshekaralyq saýdada ShOB belsendiliginiń tómendeýine alyp kelýi yqtimal.
Másele Astana qalasynyń Kásipkerler palatasynda da kóterildi.
«Biz taýarlardy Reseidegi zaýyttarǵa fýramen jóneltemiz. Endi júrgizýshiler RuID júiesinde tirkelip, QR-kod alýy qajet. Maýsym bastalǵanda atalmysh úrdiske eshkim de ázir emes. Qazirdiń ózinde kúrish, jemis-jidek, kókónis tasymalyna kólik jetispeýshiligi baiqalýda», – dedi kúrish eksporttaityn «Abzal i K» kompaniiasy direktorynyń orynbasary Aigúl Qosmuratova.
Biznes ókilderiniń aitýynsha, fýra júrgizýshileri jańa tsifrlyq rásimderdi qabyldaýǵa qulyqsyz. Olar qosymshada tirkelip, derekterdi júktep, rastaýdy kútip otyrǵylary kelmeidi. Bul jappai shekaradaǵy kidiristerge, jetkizý úzilisterine jáne reseilik seriktestermen kelisimsharttyq aiyppuldarǵa alyp kelýi múmkin. Budan bólek, QR UKP Basqarma tóraǵasynyń orynbasary Murat Amrin atap ótkendei, Eýraziialyq ekonomikalyq odaq (EAEO) kelisimi aiasynda taýarlar men qyzmetterdi erkin qozǵalysqa shyǵarý qarastyrylǵan.
Qysymnyń qosymsha faktory – Qazaqstan azamattarynyń Reseide bolý merziminiń qysqarýy. 2025 jylǵy 1 qańtardan bastap QR azamattary Reseide kúntizbelik jyl ishinde 90 kúnnen artyq bola almaidy (buryn 180 kún ishinde 90 kún bolatyn). Bul uzaq issaparlarǵa, maýsymdyq jumystarǵa jáne basqa da iskerlik belsendilik túrlerine múmkindik aiasyn taryltady.
Ýákiletti memlekettik organ ókilderiniń aitýynsha, qazirgi ýaqytta reseilik taraptyń sharalaryna jaýap retindegi áreketter talqylanýda. Degenmen, QR Úkimeti tarapynan resmi ustanym ázirge jariialanǵan joq.
Ulttyq kásipkerler palatasy Qazaqstan jáne Reseidiń memlekettik organdarymen jańa talaptardyń júzege asyrylý barysyn baqylap, kásipkerler men tasymaldaý kompaniialary úshin týyndaýy múmkin qiyndyqtarǵa jedel áreket etý maqsatyndaǵy jumysyn jalǵastyrady.
