Biyldyń ózinde quny 1,1 mlrd dollardy quraityn 22 investitsiialyq joba iske qosyldy. Bul týraly Úkimet basshysy Oljas Bektenovtyń tóraǵalyǵymen ótken "Kazakh Invest" ulttyq kompaniiasy" AQ direktorlar keńesiniń otyrysy barysynda málim boldy, dep habarlaidy Dalanews.kz.
"Kazakh Invest" UK" AQ basqarma tóraǵasy Erjan Elekeev biyl ortalyq jáne jergilikti memlekettik organdarmen birlesken jumys nátijesinde 4,8 myńǵa jýyq jumys ornyn asha otyryp, quny 1,1 mlrd dollardy quraityn 22 investitsiialyq joba iske qosylǵanyn baiandady. Búgingi tańda Almaty oblysynda volfram kenderin óńdeý jáne Almaty qalasynda isikke qarsy biregei preparattar óndirý kásiporyndary jáne basqa da nysandar ashyldy.
Sonymen qatar 7 joba boiynsha, onyń ishinde Jambyl oblysynda 1 GVt JES salý, Almaty oblysynda sút ónimderin óndirý, Shymkent qalasynda jylyjai keshenin salý boiynsha jalpy quny jalpy 2,5 mlrd dollar bolatyn investitsiialyq kelisimderge qol qoiyldy.
Qazaqstan ekonomikasynyń perspektivaly salalaryna investitsiia tartýdyń maqsatty jańa tásili engizildi. Astyqty tereń óńdeý, kómir himiiasy, munai himiiasy jáne munai-gaz jabdyqtaryn óndirý sekildi 4 baǵyt anyqtaldy.
Aldaǵy úsh jylda CHN Energy, Carlsberg, PepsiCo, ULTRADECOR, LASSELSBERGER GROUP siiaqty jáne basqa da kompaniialarmen birlese otyryp, iri jobalardy júzege asyrý úshin 10 mlrd dollar tartý josparlanyp otyr.
Investitsiialyq qyzmetti tsifrlandyrý boiynsha aqparat tyńdaldy. Investitsiialyq jobalardy barlyq kezeńderde – olardy iske qosýdan bastap paidalanýǵa berý jáne odan keiingi úsh jyldyq monitoringige deiingi súiemeldeýdiń keshendi ekojúiesin qurý boiynsha jumystar júrgizilip jatyr. Investorlarmen ózara is-qimyl "bir tereze" qaǵidaty boiynsha qurylady, sonymen birge "jasyl dáliz" jáne "prokýrorlyq súzgi" tetikteriniń jumysy qamtamasyz etiledi.
Otyrys qorytyndysy boiynsha 2025 jylǵa arnalǵan jumys jospary bekitildi.
