Májilis depýtaty Serik Maqashuly kótergen qosylǵan qun salyǵyn (QQS) qaitarý máselesine bailanysty Qarjy ministri Mádi Tákiev qazirgi jaǵdaiǵa toqtaldy, dep habarlaidy dalanews.kz.
Ministrdiń aitýynsha, sońǵy jyldary QQS qaitarý kólemi jyl saiyn ósip keledi. 2023 jyldan beri qaitarylmaǵan qaldyqtar kelesi jylǵa aýysyp, júieli sipat alǵan. 2024 jyly kásipkerlerge 1 trln 354 mlrd teńge qaitarylsa, biylǵy jospar 1 trln 800 mlrd teńge bolǵanymen, jyl sońyna qarai bul kórsetkish 3 trln 400 mlrd teńgege deiin jetýi múmkin.
2026 jyldyń basynan beri 400 mlrd teńgeden astam QQS qaitarylǵan. Sonymen qatar, tekserýden ótip, qaitarylýǵa jatatyn shamamen 1 trln teńge kólemindegi qarajat áli tólenbegen. Onyń 60 paiyzdan astamy «Samuryq-Qazyna» tobyna kiretin kompaniialarǵa tiesili.
Mádi Tákievtiń sózinshe, jańa Salyq kodeksinde QQS-ty ákimshilendirý men qaitarýdyń jańa tetikteri qarastyrylǵan. Sonyń nátijesinde QQS qaitarýshylar sany 2,3 myńnan asty, onyń 600-den astamy – shaǵyn jáne orta biznes sýbektileri.
Alaida ministr máseleniń tolyq sheshilgenin aitqan joq. Qarjy ministrliginiń málimetinshe, QQS qaitarý kóleminiń joǵary bolýy jáne jyl saiynǵy qaldyqtardyń kelesi jylǵa aýysýy ázirge saqtalyp otyr, sondyqtan jańa tásilderdiń tiimdiligi ýaqyt óte baǵalanatyn bolady.
