Qarabalyqtyq bloger Mirshat Sársenbaev qamaýdaǵy jaǵdaiǵa jáne meditsinalyq kómektiń kórsetilmeýine qarsylyq bildirip, ashtyq aktsiiasyn bastaǵanyn málimdedi, dep habarlaidy Dalanews.kz.
Sottalýshynyń aitýynsha, ol eki kúnnen beri as ta, sý da ishpegen, tipti dári-dármegin ishpei otyr.
"Ekinshi kún qatarynan medblokqa shyǵarmai otyr. Koloniia basshysy ýáde bergenimen, oryndamady. Men gipertonikpin, qant diabetimen aýyramyn, qan qysymymdy ólshei almai júrmin. Maǵan qysym kórsetilýde", – deidi Sársenbaev.
Onyń sózinshe, bul jaǵdai tamyz aiynyń sońyndaǵy jaýap alýdan keiin bastalǵan. Sol kezde ol tergeý izoliatorynda órt dabyly men órt sóndirgishterdiń joq ekenin aitqan. Sodan beri oǵan jalǵan tártip buzýshylyqtar tańylyp, tiisti qujattardyń kóshirmesi berilmegen.
Bloger keshe tártiptik izoliatorǵa jabylǵanyn, onda jaǵdai óte aýyr ekenin jetkizdi. Onyń aitýynsha, taza sý joq, kameralar sýyq ári ylǵal, ájethana beinabaqylaý astynda ornalasqan. Buǵan deiin ol keshki as pen serýennen de aiyrylǵan.
Sársenbaev buǵan deiin naýryz aiynda soqqyǵa jyǵylyp, alǵash ret DIZO-ǵa qamalǵanyn eske aldy. Qazir odan aqsha talap etip, jazasyn ótep jatqan sottalǵandarmen bir kameraǵa otyrǵyzǵanyn aitady.
Kezekti sot otyrysynan keiin ol jedel járdem shaqyrýdy surady. Sebebi izoliatordyń ishinde meditsinalyq kómekke qol jetkize almai otyr. Onyń advokattary da barlyq zańbuzýshylyqtardy sotqa jetkizgen.
Qylmystyq is qalai bastaldy?
Mirshat Sársenbaev buǵan deiin «Neýdobnye voprosy Mirshata Sarsenbaeva» atty YouTube arnasyn júrgizip, jergilikti máselelerdi kótergen. 2025 jyldyń 15 aqpanynda ol Qarabalyq qus fabrikasynyń qaldyqtaryna qatysty beinerolik jariialap, qoǵam nazaryn aýdarǵan.
20 aqpanda bloger ustalyp, bastapqyda úiqamaqqa alynǵan. Alaida prokýratýra shaǵymdanyp, sot ony qamaýǵa alý týraly sheshim shyǵardy.
Sársenbaevqa Qylmystyq kodekstiń 194-babynyń 4-bóligi 2-tarmaǵy («Asa iri kólemde qorqytyp alý») boiynsha aiyp taǵylyp otyr. Jábirlenýshi tarap retinde qus fabrikasynyń basshylyǵy tanylǵan.
Bloger men onyń týystary taǵylǵan aiypty joqqa shyǵarady. Olardyń aitýynsha, Sársenbaev eshkimnen aqsha talap etpegen, tek qoǵamǵa máseleni jetkizýdi maqsat etken.
