Osy jyldyń qazan aiynda Qostanai oblysy Jitiqara qalasynda jeke turǵyn úiden órt shyǵyp, saldarynan bes bala kóz jumǵan edi. Qaiǵyly oqiǵa kezinde úide jalǵyz qalǵan balalardyń ólimine bailanysty óńir ákimi Qumar Aqsaqalov túsinikteme berdi, dep habarlaidy Dalanews.kz.
“Ókinishke qarai, bes bala qaza tapty. Buqaralyq aqparat quraldarynda balalardyń úide qaraýsyz qalǵany aityldy. Qaiǵyly oqiǵa kezinde tiri qalǵan úlken ul tańǵa jýyq oianyp, pesh jaǵýǵa tyrysqan kórinedi. Ol otynmen birge basqa bir nárse salǵan bolýy múmkin, bul jarylysqa sebep bolǵan. Tragediiadan keiin men balalardyń anasymen kezdestim. Birneshe kún ishinde otbasyǵa eki bólmeli páter berildi,” – dedi oblys ákimi.
Sonymen qatar ol otbasyǵa qarjylai kómek kórsetilip, psihologtar qajetti qoldaý jasap jatqanyn alǵa tartty.
“Endigi basty másele – mundai jaǵdailar qaitalanbaý úshin ne isteitinimizdi sheshý. Ot jaǵý maýsymy bastalar aldynda jergilikti atqarýshy organdar men qutqarýshylar ár úidi aralap, tútin murjalary men peshterdiń jaǵdaiyn tekseredi. Biz turǵyndarǵa jylý kózderin durys paidalaný jóninde nusqaýlyq beremiz,” – dep atap ótti Qumar Aqsaqalov.
Ákim kómirqyshqyl gazynyń qurylǵylaryn ornatýdyń mańyzdylyǵyna da toqtaldy. Keibir jaǵdailarda bul qurylǵylar batareianyń joqtyǵynan istemei qalǵan.
“Osy múmkindikti paidalana otyryp, barlyq turǵynǵa úndeý jasaǵym keledi. Óz qaýipsizdikterińizge jaýapkershilikpen qarańyzdar. Tútin murjalaryn, peshterdi, datchikterdi jáne olardyń jumys isteýin únemi tekserip otyryńyzdar. Eger birdeńege qol jetkize almasańyzdar, ákimdikke nemese qutqarýshylarǵa habarlasyńyzdar, biz kómektesemiz,” – dep qorytyndylady ákim.
Eske salaiyq, 11 qazanǵa qaraǵan túni Qostanai oblysynda jeke úiden órt shyǵyp, kámeletke tolmaǵan bes bala qaza tapty. Balalar úide jalǵyz qalǵan. Altynshy bala aman qalǵan.
"Nasha gazeta" málimetinshe, qaiǵyly oqiǵa saǵat 04.29-da bolǵan.
"Qutqarýshylar 7 minýttyń ishinde kelgen. Alaida úi tutas órtenip ketken", - deidi jergilikti ákimdik ókilderi.
Órt saǵat 06.08-de tolyq sóndirilgen.
Úide 2011, 2016, 2018, 2019, 2022, 2023 jyly týǵan balalar bolǵan. Aralarynda tek 2011 jyly týǵan bala aman qalǵan.
