وسى جىلدىڭ قازان ايىندا قوستاناي وبلىسى ءجىتىقارا قالاسىندا جەكە تۇرعىن ۇيدەن ءورت شىعىپ، سالدارىنان بەس بالا كوز جۇمعان ەدى. قايعىلى وقيعا كەزىندە ۇيدە جالعىز قالعان بالالاردىڭ ولىمىنە بايلانىستى ءوڭىر اكىمى قۇمار اقساقالوۆ تۇسىنىكتەمە بەردى، دەپ حابارلايدى Dalanews.kz.
“وكىنىشكە قاراي، بەس بالا قازا تاپتى. بۇقارالىق اقپارات قۇرالدارىندا بالالاردىڭ ۇيدە قاراۋسىز قالعانى ايتىلدى. قايعىلى وقيعا كەزىندە ءتىرى قالعان ۇلكەن ۇل تاڭعا جۋىق ويانىپ، پەش جاعۋعا تىرىسقان كورىنەدى. ول وتىنمەن بىرگە باسقا ءبىر نارسە سالعان بولۋى مۇمكىن، بۇل جارىلىسقا سەبەپ بولعان. تراگەديادان كەيىن مەن بالالاردىڭ اناسىمەن كەزدەستىم. بىرنەشە كۇن ىشىندە وتباسىعا ەكى بولمەلى پاتەر بەرىلدى،” – دەدى وبلىس اكىمى.
سونىمەن قاتار ول وتباسىعا قارجىلاي كومەك كورسەتىلىپ، پسيحولوگتار قاجەتتى قولداۋ جاساپ جاتقانىن العا تارتتى.
“ەندىگى باستى ماسەلە – مۇنداي جاعدايلار قايتالانباۋ ءۇشىن نە ىستەيتىنىمىزدى شەشۋ. وت جاعۋ ماۋسىمى باستالار الدىندا جەرگىلىكتى اتقارۋشى ورگاندار مەن قۇتقارۋشىلار ءار ءۇيدى ارالاپ، ءتۇتىن مۇرجالارى مەن پەشتەردىڭ جاعدايىن تەكسەرەدى. ءبىز تۇرعىندارعا جىلۋ كوزدەرىن دۇرىس پايدالانۋ جونىندە نۇسقاۋلىق بەرەمىز،” – دەپ اتاپ ءوتتى قۇمار اقساقالوۆ.
اكىم كومىرقىشقىل گازىنىڭ قۇرىلعىلارىن ورناتۋدىڭ ماڭىزدىلىعىنا دا توقتالدى. كەيبىر جاعدايلاردا بۇل قۇرىلعىلار باتارەيانىڭ جوقتىعىنان ىستەمەي قالعان.
“وسى مۇمكىندىكتى پايدالانا وتىرىپ، بارلىق تۇرعىنعا ۇندەۋ جاساعىم كەلەدى. ءوز قاۋىپسىزدىكتەرىڭىزگە جاۋاپكەرشىلىكپەن قاراڭىزدار. ءتۇتىن مۇرجالارىن، پەشتەردى، داچيكتەردى جانە ولاردىڭ جۇمىس ىستەۋىن ۇنەمى تەكسەرىپ وتىرىڭىزدار. ەگەر بىردەڭەگە قول جەتكىزە الماساڭىزدار، اكىمدىككە نەمەسە قۇتقارۋشىلارعا حابارلاسىڭىزدار، ءبىز كومەكتەسەمىز،” – دەپ قورىتىندىلادى اكىم.
ەسكە سالايىق، 11 قازانعا قاراعان ءتۇنى قوستاناي وبلىسىندا جەكە ۇيدەن ءورت شىعىپ، كامەلەتكە تولماعان بەس بالا قازا تاپتى. بالالار ۇيدە جالعىز قالعان. التىنشى بالا امان قالعان.
"ناشا گازەتا" مالىمەتىنشە، قايعىلى وقيعا ساعات 04.29-دا بولعان.
"قۇتقارۋشىلار 7 مينۋتتىڭ ىشىندە كەلگەن. الايدا ءۇي تۇتاس ورتەنىپ كەتكەن"، - دەيدى جەرگىلىكتى اكىمدىك وكىلدەرى.
ءورت ساعات 06.08-دە تولىق سوندىرىلگەن.
ۇيدە 2011، 2016، 2018، 2019، 2022، 2023 جىلى تۋعان بالالار بولعان. ارالارىندا تەك 2011 جىلى تۋعان بالا امان قالعان.
