Qazaqtardy qorlaǵan 44 jastaǵy Qostanai turǵynyna qatysty sot úkimi shyqty, dep habarlaidy Dalanews.kz
Tobolinfo málimetinshe, Qostanai qalasynyń №2 sotynda Qostanai turǵyny Iýliia Honǵa qatysty úkim jariialandy. Ol Qazaqstan Respýblikasy Qylmystyq kodeksiniń 174-baby 1-bóligi ("Áleýmettik, ulttyq, rýlyq arazdyqty qozdyrý") boiynsha aiyptalǵan.
Is materialdaryna sáikes, 2024 jyldyń qarasha aiynyń basynda (naqty kúni anyqtalmaǵan), túngi ýaqytta shamamen saǵat 03:45-te, aiyptalýshy mas kúide TikTok áleýmettik jelisinde tikelei efir júrgizgen. Keiinirek Iýliia Honnyń advokaty Vitalii Lidiń túsindirýinshe, efir barysynda Resei men Ýkraina arasyndaǵy soǵys máselesi talqylanǵan. Sol kezde aiyptalýshy beiádep sózder aityp, pikirtalasqa qatysýshylardy, onyń ishinde qazaqtardy ultyna bailanysty qorlaityn málimdemeler jasaǵan. Sot bul áreketterdi ultaralyq arazdyqty qozdyrýǵa baǵyttalǵan dep tanydy.
Isti qaraǵan sýdia Olga Kýznetsovanyń aitýynsha, Iýliia Honnyń kinási tikelei efir jazbasymen, saraptamalyq qorytyndylarmen jáne kýágerlerdiń aiǵaqtarymen dáleldengen.
Sot sheshimimen Iýliia Hon eki jylǵa bas bostandyǵynan aiyrylyp, jazasyn eń tómengi qaýipsizdik deńgeiindegi túzeý mekemesinde óteidi. Buǵan deiin ol eshqaida ketpeý týraly qolhatpen júrgendikten, sot úkimi shyqqannan keiin birden sot zalynda qamaýǵa alyndy.
Aiyptalýshynyń jazasy jeńildetilgen. Sebebi onyń asyraýynda jol-kólik oqiǵasynan keiin kórý qabiletinen aiyrylǵan uly bar. Áiel balasynyń emine qarjy jumsap júrgeni eskerilgen.
Sondai-aq Iýliia Honnyń turmysta ekeni, jumys isteitini jáne buryn qylmystyq jaýapkershilikke tartylmaǵany belgili boldy.
Sonymen birge sot ony 826 myń teńge kólemindegi protsessýaldyq shyǵyndy óteýge mindettedi. Aiyptalýshynyń qorǵaýshysy Valerii Lidiń aitýynsha, tikelei efir barysynda onyń qorǵaýyndaǵy tulǵa da qorlyq kórgen, al ol búkil ultty emes, naqty bir adamdy ǵana balaǵattaǵan. Qorǵaý tarapy úkimge shaǵymdanatynyn málimdedi.
