قازاقتاردى قورلاعان 44 جاستاعى قوستاناي تۇرعىنىنا قاتىستى سوت ۇكىمى شىقتى، دەپ حابارلايدى Dalanews.kz
Tobolinfo مالىمەتىنشە، قوستاناي قالاسىنىڭ №2 سوتىندا قوستاناي تۇرعىنى يۋليا حونعا قاتىستى ۇكىم جاريالاندى. ول قازاقستان رەسپۋبليكاسى قىلمىستىق كودەكسىنىڭ 174-بابى 1-بولىگى ("الەۋمەتتىك، ۇلتتىق، رۋلىق ارازدىقتى قوزدىرۋ") بويىنشا ايىپتالعان.
ءىس ماتەريالدارىنا سايكەس، 2024 جىلدىڭ قاراشا ايىنىڭ باسىندا (ناقتى كۇنى انىقتالماعان)، تۇنگى ۋاقىتتا شامامەن ساعات 03:45-تە، ايىپتالۋشى ماس كۇيدە TikTok الەۋمەتتىك جەلىسىندە تىكەلەي ەفير جۇرگىزگەن. كەيىنىرەك يۋليا حوننىڭ ادۆوكاتى ۆيتاليي ءليدىڭ تۇسىندىرۋىنشە، ەفير بارىسىندا رەسەي مەن ۋكراينا اراسىنداعى سوعىس ماسەلەسى تالقىلانعان. سول كەزدە ايىپتالۋشى بەيادەپ سوزدەر ايتىپ، پىكىرتالاسقا قاتىسۋشىلاردى، ونىڭ ىشىندە قازاقتاردى ۇلتىنا بايلانىستى قورلايتىن مالىمدەمەلەر جاساعان. سوت بۇل ارەكەتتەردى ۇلتارالىق ارازدىقتى قوزدىرۋعا باعىتتالعان دەپ تانىدى.
ءىستى قاراعان سۋديا ولگا كۋزنەسوۆانىڭ ايتۋىنشا، يۋليا حوننىڭ كىناسى تىكەلەي ەفير جازباسىمەن، ساراپتامالىق قورىتىندىلارمەن جانە كۋاگەرلەردىڭ ايعاقتارىمەن دالەلدەنگەن.
سوت شەشىمىمەن يۋليا حون ەكى جىلعا باس بوستاندىعىنان ايىرىلىپ، جازاسىن ەڭ تومەنگى قاۋىپسىزدىك دەڭگەيىندەگى تۇزەۋ مەكەمەسىندە وتەيدى. بۇعان دەيىن ول ەشقايدا كەتپەۋ تۋرالى قولحاتپەن جۇرگەندىكتەن، سوت ۇكىمى شىققاننان كەيىن بىردەن سوت زالىندا قاماۋعا الىندى.
ايىپتالۋشىنىڭ جازاسى جەڭىلدەتىلگەن. سەبەبى ونىڭ اسىراۋىندا جول-كولىك وقيعاسىنان كەيىن كورۋ قابىلەتىنەن ايىرىلعان ۇلى بار. ايەل بالاسىنىڭ ەمىنە قارجى جۇمساپ جۇرگەنى ەسكەرىلگەن.
سونداي-اق يۋليا حوننىڭ تۇرمىستا ەكەنى، جۇمىس ىستەيتىنى جانە بۇرىن قىلمىستىق جاۋاپكەرشىلىككە تارتىلماعانى بەلگىلى بولدى.
سونىمەن بىرگە سوت ونى 826 مىڭ تەڭگە كولەمىندەگى پروسەسسۋالدىق شىعىندى وتەۋگە مىندەتتەدى. ايىپتالۋشىنىڭ قورعاۋشىسى ۆالەريي ءليدىڭ ايتۋىنشا، تىكەلەي ەفير بارىسىندا ونىڭ قورعاۋىنداعى تۇلعا دا قورلىق كورگەن، ال ول بۇكىل ۇلتتى ەمەس، ناقتى ءبىر ادامدى عانا بالاعاتتاعان. قورعاۋ تاراپى ۇكىمگە شاعىمداناتىنىن مالىمدەدى.
