Qostanaida jemqorlyqqa jol bergen aýyl sharýashylyǵy ministrligi komitetiniń tóraǵasy men kásipkerge sot úkimi shyqty, dep habarlaidy Dalanews.kz.
Antikor qarasha aiynda para alý sáti túsirilgen videony jariialaǵan bolatyn. Videoda kásipker AShM komitetiniń basshysyna 2 million 400 myń teńge salynǵan konvertti kafede ústel astynan beredi. Al maýsym aiynda, komitet basshysy úshinshi tulǵa arqyly sol kásipkerden 2 million teńge alǵan bolatyn.
Bul para pestitsidterdi satyp alý týraly shartqa bailanysty berilgen. Onyń somasy 78 million 125 myń teńgeni quraǵan.
Sot sheshimimen AShM komitetiniń tóraǵasy 3,5 jylǵa bas bostandyǵynan aiyrylyp, para bergen kásipker 3 jylǵa sottaldy. Ekeýi de ortasha qaýipsizdik mekemesinde jazasyn óteidi jáne ómir boiy belgili bir laýazymdardy atqarý quqyǵynan aiyrylady. Jalpy somasy 4,4 million teńge para memleket kirisine tárkilendi.
Úkim áli kúshine engen joq.
