Qostanaida memlekettik sýbsidiiany jymqyrǵan, keiin aqshany zańdastyrǵan qylmystyq top sottaldy, dep habarlaidy Dalanews.kz.
Beef Export Group JShS basshysy A.G. Parhomenko jetekshilik etken qylmystyq top Aýyl sharýashylyǵy basqarmasynyń laýazymdy tulǵalarynyń qatysýymen, sondai-aq, aýdandyq deńgeidegi aýyl sharýashylyǵy taýaryn óndirýshiler jáne veterinariia mamandarymen kelisý arqyly sýbsidiiany zańsyz alý shemasyn uiymdastyrǵan.
"Qaskóiler iri qara maldy satyp alý jáne ony qaita óńdeý týraly qujattardy jalǵan jolmen rásimdeý arqyly agroónerkásip keshenin damytýǵa arnalǵan memlekettik baǵdarlama aiasynda júieli túrde sýbsidiia alyp otyrǵan. Túsken qarajat mal aqysyna tólengendei etip kórsetilip, aqparattyq júielerge engizilgennen keiin qolma-qol aqshaǵa ainaldyrylyp, keiin jalǵan ónim úshin tólem retinde baqylaýdaǵy uiymdardyń shotyna qaita aýdarylǵan. Memleketke 3 mlrd teńgeden asa zalal kelgen", - dep jazylǵan QMA habarlamasynda.
Tergeý barysynda kúdiktiler 107 mln teńgeden asa qarajatty erikti túrde ótegen. Sot úkimimen uiymdastyrýshy A.G. Parhomenko 14 jylǵa bas bostandyǵynan aiyryldy.
Qylmystyq toptyń 14 qatysýshysyna 6 jyldan 10 jylǵa deiin bas bostandyǵynan aiyrý jazasy taǵaiyndaldy.
Jalpy quny 3 mlrd teńge bolatyn múlik, sonyń ishinde 1,3 mln AQSh dollary jáne 700 mln teńge tárkilendi. Úkim zańdy kúshine engen joq.
