Úkimet Qostanai oblysyndaǵy jylý júielerin rekonstrýktsiialaýǵa jáne sý jelilerin jańǵyrtýǵa 2,2 mlrd teńge qarajat bóldi. Bul Qostanai, Jitiqara, Arqalyq jáne Rýdnyi qalalary arasynda úlestirilmek, dep habarlaidy Dalanews.kz.
Qostanaida 188 mln teńge 1955 jyldan beri jumys istep turǵan jylý elektr ortalyǵynyń negizgi bý qubyryn jańartýǵa baǵyttalady.
Jitiqarada jylý jelileriniń úsh ýchaskesin jóndeýge shamamen 863 mln teńge bólinedi. Bul ýchaskeler 15,5 myń abonentti jylýmen qamtamasyz etedi.
Arqalyq qalasyna jelilerdi rekonstrýktsiialaýdy jalǵastyrý úshin 645 mln teńge beriledi. 2025 jyly 1,6 shaqyrym tozyǵy jetken qubyrlar tolyq aýystyrylady.
Rýdnyida 500 mln teńge sý jelilerin jańǵyrtýǵa, sonyń ishinde №2 súzgileý stantsiiasyn modernizatsiialaýǵa jumsalady. Joba Rýdnyi, Qashar, Gorniatskii kentteriniń jáne ónerkásiptik nysandardyń turaqty sý qamtamasyz etilýin kúsheitedi.
