Qostanai oblysynda politsiianyń eks-qyzmetkeri sintetikalyq esirtki taratqany úshin 15 jylǵa bas bostandyǵynan aiyryldy, Dalanews.kz.
Qostanai qalasy PB Esirtki qylmysyna qarsy kúres bólimi bastyǵynyń eks-orynbasary tergeý kezinde anyqtalmaǵan politsiia qyzmetkerlerimen birlese otyryp, densaýlyǵyna ziian keltirý jáne qorqytý arqyly bir azamatty ekinshisin asa aýyr qylmys jasaýǵa itermeleýge májbúrlegen, sodan keiin ony áshkerelep, qylmystyq jaýapkershilikke tartýdy kózdegen.
Laýazymdy tulǵa qyzmettik kólikte otyryp, qylmystyq áreketke qatysýshy keipinde kelgen adamǵa asa iri kólemde psihotroptyq zattar men olardyń analogtaryn birneshe ret zańsyz ótkizgen.
Tekserý barysynda onyń avtokóliginiń salonynan asa iri kólemde ótkizý maqsatynda zańsyz saqtap, tasymaldap júrgen gashish pen metkatinon (psihotroptyq zattyń analogy) tabylyp, tárkilendi.
Sottalýshy óz kinásin moiyndamady, onyń qorǵaýshylary onyń áreketinde qylmys quramynyń bolmaýyna bailanysty aqtaýdy surady.
"Sottalýshynyń kinási jábirlenýshilerdiń, kýálardyń aiǵaqtarymen, tergeý áreketteriniń hattamalary men beinematerialdarymen, sot saraptamasynyń qorytyndylarymen jáne basqa da is materialdarymen tolyq dáleldendi", - dep jazylǵan habarlamada.
Sottalýshynyń asyraýynda kámeletke tolmaǵan balalardyń bolýy jaýaptylyqty jeńildetetin mán-jailar dep tanyldy. Aýyrlatatyn faktorlar anyqtalmaǵan.
Sottalýshynyń jeke basyn, is-áreketiniń sipaty men qoǵamdyq qaýiptilik dárejesin, istiń barlyq mán-jaiyn eskere otyryp, sondai-aq QK-niń 55-babynyń 2-bóliginiń normalaryn qoldana otyryp, sottalýshyǵa 15 jylǵa bas bostandyǵynan aiyrý jazasy berildi. Ol memlekettik qyzmette laýazymdardy atqarý quqyǵynan ómir boiyna aiyryldy. "Politsiia kapitany" arnaiy ataǵy qaitaryldy.
Úkim zańdy kúshine engen joq.
