Qostanai oblysynda býhgalter biýdjet qarajatyn urlaǵan is boiynsha sotaldy tergeý bastaldy, dep habarlaidy Dalanews.kz.
Qarabalyq aýdanynyń prokýratýrasy Novotroitsk aýyldyq okrýgi ákimi apparatynyń býhgalteri 9,8 mln teńge kóleminde biýdjet qarajatyn urlaǵanyn anyqtady.
"Shtat kestesi men bank shottaryn salystyrý barysynda 4 jyl ishinde ózine artyq somany eseptegen býhgalterdiń tólengen jáne naqty tólený kerek jalaqysy arasyndaǵy aiyrmashylyq anyqtaldy. Osy derek boiynsha aýdan prokýratýrasy Qazaqstan Respýblikasy Qylmystyq kodeksiniń 189-baby 3-bóliginiń 1) tarmaǵy, iaǵni iri mólsherde urlaý boiynsha sotaldy tergep-tekserýdi bastady", - dep jazylǵan habarlamada.
Bul baptyń sanktsiiasy 2 jyldan 7 jylǵa deiingi merzimge bas bostandyǵyn shekteý ne sol merzimge bas bostandyǵynan aiyrý túrindegi jazany kózdeidi.
Qosymsha jaza retinde múlikti tárkileý, sondai-aq, belgili bir laýazymdardy atqarý nemese belgili bir qyzmetpen alty jylǵa deiin ainalysý quqyǵynan aiyrý qarastyrylǵan.
