Qostanai oblysynyń soltústigi men ońtústiginde ornalasqan birneshe aýdan men Qostanai qalasynyń shetki kóshelerin sý basqan bolatyn. «Ádildik jáne Órkendeý» QQ belsendileri úi-kúisiz qalǵan turǵyndardyń jaǵdaiyna bei-jai qarai almai, zardap shekken halyqqa járdem berýdi sheshti, dep habarlaidy Dalanews.kz. «Ádildik jáne Órkendeý» Qoǵamdyq qorynyń jinalysynda árbirimiz óz óńirlerimiz boiynsha sý basqan aimaqtarǵa baryp, tanysyp qaitýdy usynǵan bolatynmyn.
Elden habar alyp otyramyz, jaǵdaidan qulaǵdarmyz, dese de «Myń estigennen bir kórgen artyq» demekshi, el jaiyn óz kózimmen kórip keldim»,-dedi qostanailyq belsendi Amandyq Ámirhamzin.
Halyqpen sóileskennen keiin Qor ókili áleýmettik jeliler arqyly Qazaqstan azamattaryn judyryqtai jumylyp, zardap shekken jurtqa kómek kórsetýdi surady. Onyń bastamasy búkil el boiynsha qoldaý tapty. Elimizdiń túkpir-túkpirinen Qostanai oblysynda zardap shekken azamattarymyzǵa qarajat aýdaryldy. Jinalǵan aqsha esebinen belsendi elge kerek zattardy jóneltti.
«Qostanai tańy» gazetiniń bas direktory Kenjesh Orazǵaliqyzy bizge habarlasyp, Torǵai ólkesine qoldaý kórsetý týraly usynys jasady. Munda kúrek, qapshyq, mańdaiǵa taǵatyn shamdar men rezeńke etik tapshylyǵy baiqalady. Biz bul usynysty qoldap, qarajat jinai bastadyq. Nátijesinde zardap shekkenderge quny jarty million teńgeni quraǵan gýmanitarlyq kómek jiberdik. Táýish aýylyna qajet bolǵan qapshyqtar, turmystyq zattardy satyp alyp, júk kóligimen jónelttik. Sondai-aq qarjylai 400 myń teńge jiberdik», – dedi belsendi.
Keiin «Ádildik jáne Órkendeý» Qorynyń ókili sý basyp, jol-kólik qatynasynsyz qalǵan aýyldarǵa motorly qaiyq jiberýdi jón kórdi. Sebebi, munda jurttyń qozǵalysy shekteýli. El janashyry Amandyq Ámirhamzinniń bastamasyn shetelde júrgen Qazaqstannyń týmalary da qoldady. Olar japa shekken aýyl turǵyndaryna qomaqty aqsha jiberdi.
«Bizge AQSh-taǵy Denver qalasynyń turǵyndary habarlasty. Olar biraz qarajat jiberdi. Biz de óz aqshamyzdy qosyp, sapasy jaqsy motorly qaiyq satyp aldyq. Missiiamyz oryndaldy. Motorly qaiyqty Qostanai oblysy Jangeldin aýdany ákimdigine tapsyrdyq», – dedi Amandyq Ámirhamzin.
Bul igi isti QR Parlamenti Májilisiniń depýtat Berik Bisenǵaliev te qoldap, zardap shekken eldi mekenderge 2 qaiyq jiberdi.
Sonymen qatar qostanailyq belsendiler sý tasqynynan zardap shekken Atyraý óńiriniń turǵyndaryna da járdem berip, 200 myń teńge qarajat aýdardy.
Esterińizge sala keteiik, sý tasqyny kezinde «Ádildik jáne Órkendeý» Qorynyń Túrkistan oblysy, Shymkent jáne Astana qalalar ókilderi de zardap shekken óńirlerge gýmanitarlyq júkter jibergen bolatyn. Al, sý tasqyny bolǵan aimaqtaǵy belsendiler qutqarýshylarǵa bógetter men qorǵanys qurylystaryn salýǵa qatysyp jatyr. Sonymen qatar Qoǵamdyq qor qyzmetkerleri sý tasqynynan zardap shekken oblys turǵyndarynyń atyna bir kúndik tabysyn aýdardy.
