قوستاناي وبلىسىنىڭ سولتۇستىگى مەن وڭتۇستىگىندە ورنالاسقان بىرنەشە اۋدان مەن قوستاناي قالاسىنىڭ شەتكى كوشەلەرىن سۋ باسقان بولاتىن. «ادىلدىك جانە وركەندەۋ» قق بەلسەندىلەرى ۇي-كۇيسىز قالعان تۇرعىنداردىڭ جاعدايىنا بەي-جاي قاراي الماي، زارداپ شەككەن حالىققا جاردەم بەرۋدى شەشتى، دەپ حابارلايدى Dalanews.kz. «ادىلدىك جانە وركەندەۋ» قوعامدىق قورىنىڭ جينالىسىندا ءاربىرىمىز ءوز وڭىرلەرىمىز بويىنشا سۋ باسقان ايماقتارعا بارىپ، تانىسىپ قايتۋدى ۇسىنعان بولاتىنمىن.
ەلدەن حابار الىپ وتىرامىز، جاعدايدان قۇلاعدارمىز، دەسە دە «مىڭ ەستىگەننەن ءبىر كورگەن ارتىق» دەمەكشى، ەل جايىن ءوز كوزىممەن كورىپ كەلدىم»،-دەدى قوستانايلىق بەلسەندى اماندىق ءامىرحامزين.
حالىقپەن سويلەسكەننەن كەيىن قور وكىلى الەۋمەتتىك جەلىلەر ارقىلى قازاقستان ازاماتتارىن جۇدىرىقتاي جۇمىلىپ، زارداپ شەككەن جۇرتقا كومەك كورسەتۋدى سۇرادى. ونىڭ باستاماسى بۇكىل ەل بويىنشا قولداۋ تاپتى. ەلىمىزدىڭ تۇكپىر-تۇكپىرىنەن قوستاناي وبلىسىندا زارداپ شەككەن ازاماتتارىمىزعا قاراجات اۋدارىلدى. جينالعان اقشا ەسەبىنەن بەلسەندى ەلگە كەرەك زاتتاردى جونەلتتى.
«قوستاناي تاڭى» گازەتىنىڭ باس ديرەكتورى كەنجەش ورازعالي قىزى بىزگە حابارلاسىپ، تورعاي ولكەسىنە قولداۋ كورسەتۋ تۋرالى ۇسىنىس جاسادى. مۇندا كۇرەك، قاپشىق، ماڭدايعا تاعاتىن شامدار مەن رەزەڭكە ەتىك تاپشىلىعى بايقالادى. ءبىز بۇل ۇسىنىستى قولداپ، قاراجات جيناي باستادىق. ناتيجەسىندە زارداپ شەككەندەرگە قۇنى جارتى ميلليون تەڭگەنى قۇراعان گۋمانيتارلىق كومەك جىبەردىك. ءتاۋىش اۋىلىنا قاجەت بولعان قاپشىقتار، تۇرمىستىق زاتتاردى ساتىپ الىپ، جۇك كولىگىمەن جونەلتتىك. سونداي-اق قارجىلاي 400 مىڭ تەڭگە جىبەردىك»، – دەدى بەلسەندى.
كەيىن «ادىلدىك جانە وركەندەۋ» قورىنىڭ وكىلى سۋ باسىپ، جول-كولىك قاتىناسىنسىز قالعان اۋىلدارعا موتورلى قايىق جىبەرۋدى ءجون كوردى. سەبەبى، مۇندا جۇرتتىڭ قوزعالىسى شەكتەۋلى. ەل جاناشىرى اماندىق ءامىرحامزيننىڭ باستاماسىن شەتەلدە جۇرگەن قازاقستاننىڭ تۋمالارى دا قولدادى. ولار جاپا شەككەن اۋىل تۇرعىندارىنا قوماقتى اقشا جىبەردى.
«بىزگە اقش-تاعى دەنۆەر قالاسىنىڭ تۇرعىندارى حابارلاستى. ولار ءبىراز قاراجات جىبەردى. ءبىز دە ءوز اقشامىزدى قوسىپ، ساپاسى جاقسى موتورلى قايىق ساتىپ الدىق. ميسسيامىز ورىندالدى. موتورلى قايىقتى قوستاناي وبلىسى جانگەلدين اۋدانى اكىمدىگىنە تاپسىردىق»، – دەدى اماندىق ءامىرحامزين.
بۇل يگى ءىستى ق ر پارلامەنتى ءماجىلىسىنىڭ دەپۋتات بەرىك بيسەنعالييەۆ تە قولداپ، زارداپ شەككەن ەلدى مەكەندەرگە 2 قايىق جىبەردى.
سونىمەن قاتار قوستانايلىق بەلسەندىلەر سۋ تاسقىنىنان زارداپ شەككەن اتىراۋ ءوڭىرىنىڭ تۇرعىندارىنا دا جاردەم بەرىپ، 200 مىڭ تەڭگە قاراجات اۋداردى.
ەستەرىڭىزگە سالا كەتەيىك، سۋ تاسقىنى كەزىندە «ادىلدىك جانە وركەندەۋ» قورىنىڭ تۇركىستان وبلىسى، شىمكەنت جانە استانا قالالار وكىلدەرى دە زارداپ شەككەن وڭىرلەرگە گۋمانيتارلىق جۇكتەر جىبەرگەن بولاتىن. ال، سۋ تاسقىنى بولعان ايماقتاعى بەلسەندىلەر قۇتقارۋشىلارعا بوگەتتەر مەن قورعانىس قۇرىلىستارىن سالۋعا قاتىسىپ جاتىر. سونىمەن قاتار قوعامدىق قور قىزمەتكەرلەرى سۋ تاسقىنىنان زارداپ شەككەن وبلىس تۇرعىندارىنىڭ اتىنا ءبىر كۇندىك تابىسىن اۋداردى.
