Qazaqstanda qosymsha qun salyǵyn (QQS) arttyrý týraly bastama qoǵamda qyzý talqylanýda. Bul usynys ekonomikanyń kúrdeli jaǵdaiyn ońalta ala ma degen suraqqa «Uchet» kompaniialar tobynyń negizin qalaýshy Maksim Baryshev saiasattanýshy Dosym Sátpaevqa bergen suhbatynda jaýap berdi, dep habarlaidy Dalanews.kz.
Sátpaevtyń aitýynsha, QQS mólsherlemesin kóbeitý halyqtyń satyp alý múmkindigin tómendetip, tutynýshylyq suranysqa tikelei keri áser etedi. Nátijesinde, kásipkerler úshin jumys isteý tiimsiz bolyp, shaǵyn jáne orta biznes ókilderi azaia bastaidy. Bul óz kezeginde salyq túsiminiń kemýine ákeledi. Saiasattanýshynyń pikirinshe, úkimet bul qadamdy memlekettik kiristi arttyrýdyń joly retinde kórsetkisi keledi, biraq bul tek ýaqytsha ári taktikalyq sheshim ǵana. Onyń oiynsha, bul – “óz aiaǵyńa oq atý” syndy áreket. Óitkeni biznes ókilderi mundai ózgeristerdiń keri áseri kóp bolatynyn aldyn ala eskertken edi.
Maksim Baryshev ta bul máselege qatysty óz kózqarasyn bildirdi. Ol úkimettiń qazirgi tańda biýdjet tapshylyǵyn jabý úshin ulttyq qordan qarajat alyp, QQS mólsherlemesin ósirýge tyrysyp jatqanyn aitady. Boljam boiynsha, bul tásilmen biýdjetke qosymsha 5-7 trillion teńge tartýǵa bolady dep kútilýde. Degenmen Baryshev qarapaiym matematikalyq eseptiń ózin bul ideianyń tiimdi emestigin kórsetetinin alǵa tartty. Mysaly, qazirgi 12 paiyzdyq mólsherlememen 5 trln teńge jinalsa, mólsherlemeni 30%-ǵa ósirgende, bar bolǵany 1,5 trln teńge ǵana qosylady – barlyǵy 6,5 trln teńge. Alaida bul jerde baǵanyń ósýi tutynýdy azaityp jiberetin “suranys elastikalyǵy” faktoryn da eskerý qajet. Demek, QQS ósken saiyn halyq az tutynyp, biýdjetke túsetin salyq tipten azaiýy da múmkin.
Sarapshylar QQS-ty kóterý – uzaqmerzimdi sheshim emes, kerisinshe ýaqytsha, qysqamerzimdi amal ekenin aitady. Bul tásil uzaq ýaqytta ekonomikalyq baiaýlaý, biznestiń kóleńkeli aimaqqa ketýi jáne halyq tabysynyń tómendeýine alyp kelýi yqtimal. Sondyqtan mundai sheshimge kelmes buryn onyń barlyq yqtimal saldaryn tereń zerttep baryp qana áreket etý kerek.
