Prezident janyndaǵy reformalar jónindegi Joǵarǵy keńestiń keshe jariialanǵan quramyna qarap, búginnen bastap «elde bolýy múmkin saiasi reformadan túńile berýge bolady» dep sanaimyn: keńes quramynda qoǵamdyq-saiasi ómirge qozǵaý salyp, ony túbegeili ózretýge qatysty tushymdy usynys aita alatyn kim bar?
Shetinen buǵan deiin «demokratiia, ádilettik, pliýralizm» degen sózderdi aýzyna alyp kórmegen adamdar!
Biz sekildi qatty sóz aityp, bilikke jaqpai júrgen oppozitsiiany shaqyrmai-aq qoisyn, biraq el ishinde bilikke qatysty «ógizdi óltirmei, arbany syndyrmai», pikirin ashyq aityp júrgen bilimdi, bilikti, óz ustanymy bar, qoǵamdyq ómirde tájiribesi mol azamattar bar emes pe?
Nege solardy reforma isine tartpasqa? Keńestiń maqsaty da sol - sonyń ishinde, saiasi reforma - emes pe? Myna syqiyp qalǵan shendiler saiasi reformaǵa qatysty halyq kóńilinen shyǵatyndai ne aita alady?
Basqasyn aitpaǵanda, bári de osy kúnge deiin laýazymdy qyzmetterde bolyp, ekonomika, áleýmettik sala men qoǵamdyq-saiasi ómirdi turalatyp tastaǵan dál osylar emes pe? Endi olar ózderi qurǵan júieni qalai ózgertpek? Dál solar reformator bolady degenge sene almaimyn, oǵan ol adamdardyń ómirbaiany men osy kúnge deiingi qatyp-semip qalǵan ustanymdary sebep!
Keńes basshysy - prezidenttiń orynbasary bolǵan, Eýropa qaita qurý jáne damý bankiniń eks-prezidenti Sýma Chakrabartige de qatysty bir oi.
Iá, shetel tájiribesin eskergen jón-aq. Keńesshi bolsa, bolsyn.
Biraq shetel azamatyn eldegi asa mańyzdy qurylymnyń basshysy etý, ony formaldy túrde sonshalyqty institýttendirý, oǵan óz azamattarymyzdy (jai azamattar emes, bilik organdarynyń basshylaryn) basqartyp qoiý durys emes dep oilaimyn.
Ózin reformator dep jariialaǵan prezident bir nárseni túsinýi kerek: oǵan degen senim ol quryp jatqan qurylymdarǵa degen senimnen bastalady! Quramynda qoǵam ókilderi joq qurylym qoǵamnyń sózin sóilep, shynaiy reforma jasai alady degenge búginde eshkim de senbeidi!
Ámirjan Qosannyń jazbasy
