AQSh Iranǵa qarsy "Economic Outcast" atty jańa ekonomikalyq naýqan bastap ketti. Endi Vashington úshinshi elder men sheteldik kompaniialarǵa da eskertý jasap otyr. Iran ekonomikasynyń sanktsiiaǵa túsken salalarymen jumys istegender AQSh qarjy júiesine qoljetimdiligin joǵaltýy múmkin. Jańa qysym eń aldymen qarjy, tehnologiia, altyn, aviatsiia jáne teńiz tasymalyna baǵyttalǵan, dep habarlaidy dalanews.kz Dala INSIDE derekkózine silteme jasap.
Dál osylardyń ishinen Qazaqstanǵa teńiz tasymaly baǵyty aýyr tiedi. Sebebi, bizdiń Irannyń Parsy jaǵalaýyndaǵy Bender-Abbas portynda terminal salýymyz teńiz tasymaly kategoriiasyna jartylai enip tur.
"Qazir Ádilet jáne Syrtqy ister ministrligi arqyly Qazaqstan Bender-Abbasta terminal salý jáne oǵan qurlyq arqyly baratyn logistikany kúsheitý jobasy osy shekteýlerge zańdyq turǵydan qaishy ma, qaishy emes pe sony anyqtap almaq. Quryltai naýqany tolyq bitkennen keiin, AQSh tarapymen jabyq konsýltatsiialar bastalady. Biraq Vashington qatań túrde joq dese, amal joq, Iranmen bul tirlikti jaba turýǵa májbúr bolamyz", - deidi, DALA INSIDE derekkózi.
Osy jazda Qazaqstan Iranmen Bender-Abbastaǵy Shahid Radjai portynda óziniń kólik-logistikalyq terminalyn salý jónindegi BOT-kelisimge qol qoiǵan edi. Kelisim 27 jylǵa jasalǵan. Alǵashqy eki jylda Qazaqstan terminal salyp, sony 25 jyl paidalanýy tiis edi. Terminal Qazaqstanǵa Parsy shyǵanaǵy, Úndistan, Ońtústik-Shyǵys Aziia jáne Shyǵys Afrika naryqtaryna tikelei shyǵý úshin kerek.
AQSh oqshaýlaý rejimi tolyq kúshine ense, bul terminaldy halyqaralyq deńgeide tolyqqandy paidalaný qiyndaidy. Sheteldik bank tólem júrgizýden bas tartýy múmkin, halyqaralyq saqtandyrý kompaniialary kemelerdi saqtandyrmai qoiýy yqtimal, al iri tasymaldaýshylar men investorlar secondary sanctions táýekelinen qashady.
Demek, biz ózimizdiń zapastaǵy balama jobamyzǵa qaita oralatyn siiaqtymyz. Úkimet buǵan deiin Iran baǵyty iske aspasa, Aýǵanstan arqyly Pákistannyń tereń sý porttaryna shyǵýdy da qarastyrǵan edi. Onda talibtermen uzaq ýaqyt dos bolyp, taǵy da keýde qaǵystyrýǵa týra keledi. Jáne Kabýlǵa úlken issapar kútińizder.
