14 tamyzda Qazaqstannyń birneshe óńirin jaryqsyz qaldyrǵan iri energetikalyq apat máselesi Úkimette qaita kóterildi. Blekaýttyń naqty sebebi áli tolyq anyqtalǵan joq. Osyǵan bailanysty Premer-ministr Oljas Bektenov energetikalyq júieniń senimdiligin kúsheitip, mundai jaǵdailardyń qaitalanýyna jol bermeý jóninde tapsyrma berdi.
Energetika ministri Erlan Aqkenjenovtiń málimdeýinshe, oqiǵany zerttep jatqan memlekettik komissiianyń jumysy áli aiaqtalmaǵan. Qazir mamandar alǵashqy aqaýdan keiin Almaty energiia torabynyń nelikten ajyraǵanyn jáne Qazaqstannyń elektr jelilerindegi qorǵanys júieleriniń qalai jumys istegenin anyqtap jatyr.
Blekaýtqa Toqtoǵul GES-i sebep boldy ma?
«KEGOC» kompaniiasynyń málimetine sáikes, 14 tamyz kúni Qyrǵyzstandaǵy Toqtoǵul sý elektr stantsiiasynyń eki gidrogeneratory ajyratylǵan. Sonyń saldarynan elektr energiiasynyń tranzittik aǵyndaryna túsetin júkteme artyp, apatqa qarsy avtomatika iske qosylǵan.
Nátijesinde Qazaqstannyń ońtústik energetikalyq aimaǵy eldiń Biryńǵai energetikalyq júiesinen jáne Ortalyq Aziianyń birikken energojúiesinen ýaqytsha bólinip qalǵan.
Apat saldarynan Almaty, Jambyl, Túrkistan, Qyzylorda jáne Qaraǵandy oblystarynda, sondai-aq Jetisý, Ulytaý men Abai oblystarynda elektr energiiasy óshken.
Qyrǵyz tarapy Toqtoǵul GES-indegi eki agregattyń ajyratylǵanyn rastaidy. Alaida odan keiin Qazaqstan aýmaǵynda qandai protsester bolǵany ázirge memlekettik komissiianyń qorytyndysynan keiin belgili bolady.
Jaryq 2,5 saǵatta qalpyna keltirildi
Apattan keiin «KEGOC» mamandary qalpyna keltirý jumystaryna birden kirisken. Energetika ministrliginiń dereginshe, eldiń búkil energetikalyq júiesi shamamen 2,5 saǵat ishinde tolyq qalpyna keltirilgen.
Sonymen birge tergeý aiaqtalǵannan keiin qosymsha qaýipsizdik sharalary qabyldanbaq. Atap aitqanda, relelik qorǵanys pen júielik avtomatika jabdyqtaryna kezekten tys tekserý júrgizilip, olardyń jumys parametrleri qaita baptalady.
Jańa energetikalyq jobalar jaǵdaidy ózgerte me?
Ministrlik elektr energiiasynyń tapshylyǵyn azaitý jáne júieniń turaqtylyǵyn arttyrý úshin jańa generatsiia nysandaryn iske asyrýdy jalǵastyryp jatyr. Qazirgi tańda Almatydaǵy №2 jáne №3 JEO-ny jańǵyrtý, sondai-aq Túrkistan oblysynda qýaty 1000 MVt bolatyn jańa bý-gaz qondyrǵysyn salý jobalary júzege asyrylýda.
Budan bólek, ońtústik óńirdiń energetikalyq qaýipsizdigin kúsheitý úshin 500 kV Shý – Jambyl – Shymkent elektr berý jelisi salynyp jatyr. Bul jobany 2027 jyldyń ekinshi toqsanynda aiaqtaý josparlanǵan.
Al ministrdiń aitýynsha, Almaty qalasynda 17 jáne 20 tamyz kúnderi bolǵan elektr qýatynyń óshýi 14 tamyzdaǵy aýqymdy blekaýtpen bailanysty emes.
Soǵan qaramastan basty suraq ázirge ashyq kúiinde qalyp otyr: Qazaqstandaǵy iri apatqa tek Toqtoǵul GES-indegi eki agregattyń ajyratylýy sebep boldy ma, álde otandyq energojúiede de osal tustar bar ma?
Bul suraqqa memlekettik komissiianyń qorytyndysy jaýap berýi tiis.
