Túrkistan oblysy Keles aýdanyna qarasty Alpamys batyr aýylyndaǵy Beiimbet Mailin atyndaǵy mekteptiń muǵalimderinen jóndeý jumystaryna qarjy jinalǵany týraly aqparat tarady. Bul máseleni zańger ári jýrnalist Lázzat Asanova kóterdi, dep habarlaidy dalanews.kz.
Onyń jazýynsha, mektep qyzmetkerlerinen kúrdeli jóndeý jumystarynyń smetasyn ázirleý úshin bastapqyda 400 myń teńge jinalǵan. Keiin qarajat jetkiliksiz degen sebeppen taǵy 800 myń teńge alynǵan. Osylaisha, jinalǵan jalpy soma 1,2 mln teńgege jetken.
"Smetaǵa aqsha jinaý kerek bolǵan soń, jinap berdik", - deidi muǵalimderdiń biri.
Al Keles aýdandyq bilim bólimi mundai tapsyrma bermegenin málimdegen. Osyǵan bailanysty Lázzat Asanova qarajat jinaýǵa kim bastamashy bolǵanyn, aqshanyń kimge berilip, qaida jumsalǵanyn anyqtaýdy talap etti.
"Eger bul aqparat ras bolsa, qarajatty jinaýǵa kim tapsyrma berdi? Aqsha kimge ótkizildi? Qaida jumsaldy? Qarjylyq esebi bar ma?", - dep jazdy ol.
Jazbada mekteptiń materialdyq-tehnikalyq jaǵdaiyna qatysty da másele kóterilgen. Ustazdardyń sózinshe, joǵary synyp oqýshylary bilim alatyn keibir kabinetter talapqa sai jabdyqtalmaǵan, zamanaýi quraldar jetkiliksiz.
Lázzat Asanova memlekettik mekteptiń jóndeý shyǵyndaryn muǵalimder óz qaltasynan tóleýge mindetti emes ekenin atap ótti. Ol 1,2 mln teńge jinaý týraly aqparatty resmi túrde tekserip, mektep jóndeýine biýdjetten qansha qarajat bólingenin jáne onyń qalai jumsalǵanyn qoǵamǵa ashyq kórsetýdi surady.
"Bul – bir mekteptiń ǵana máselesi emes. Bul – bilim salasyndaǵy qarjylyq tártip pen jaýapkershilik máselesi. Quzyrly organdar naqty jaýap bersin: Beiimbet Mailin mektebin memleket qarjylandyryp otyr ma, álde ustazdardyń qaltasy ma?", - dedi zańger.
Ázirge mektep ákimshiligi men quzyrly organdar atalǵan málimdemege qatysty resmi túsinikteme bergen joq.
