Ujymdyq qaýipsizdik týraly shart uiymy jarǵylyq organdarynyń otyrysy aiasynda Qorǵanys ministri general-polkovnik Rýslan Jaqsylyqovtyń UQShU Bas hatshysy Imanǵali Tasmaǵambetovpen jumys kezdesýi ótti, dep habarlaidy Dalanews.kz.
Suhbat barysy áskeri yntymaqtastyqtyń ózekti máseleleri jáne Qazaqstannyń Ujymdyq qaýipsizdik týraly shart uiymyna tóraǵalyq etýiniń basym baǵyttaryn iske asyrý tóńireginde boldy.
Taraptar UQShU Ujymdyq qaýipsizdik keńesiniń sessiiasyna jáne Syrtqy ister ministrleri keńesiniń, Qorǵanys ministrleri keńesiniń jáne Uiymnyń qaýipsizdik keńesteri hatshylary komitetiniń birlesken otyrysyna daiyndyq máselelerin de qozǵady.
Aita keteiik, birlesken sharalar 28 qarashada Astanada ótedi.
Eske salaiyq, buǵan deiin Máskeýde ótken TMD elderi qaýipsizdik keńesteri hatshylarynyń 12-otyrysyna qatysqan UQShU bas hatshysy Imanǵali Tasmaǵambetov álemdik jáne UQShU shekaralaryndaǵy birqatar qaýip-qaterge nazar aýdarǵan edi.
- Batys Eýropa aýmaǵynda alys qashyqtyqtaǵy qarýdy ornalastyrý týraly qabyldanǵan amerikalyq-germandyq sheshim qurlyqta jáne tutastai alǵanda, álemde iadrolyq-zymyrandyq qarýlanýdyń qaita jandaný qaýpin týdyrǵan;
- Belarýs pen Resei Federatsiiasynyń shekaralarynda NATO qarýly kúshteri men aqparattyq soǵys ortalyqtarynyń shoǵyrlanýy jalǵasyp jatyr. Finliandiia men Shvetsiia Soltústik Atlantikalyq aliansqa qosylǵannan keiin strategiialyq jaǵdai nasharlaǵan;
- Reseimen qarýly qaqtyǵysty jalǵastyrý úshin Ýkrainaǵa ekonomikalyq, qarjylyq jáne áskeri qoldaý artyp barady. Úlken aýmaqtarda, sonyń ishinde urys aimaǵynan tys jerlerde apatty saldarǵa ákeletin atom elektr stantsiialaryndaǵy tótenshe oqiǵalardyń qaýpi birneshe ese artqan;
- Jasandy intellektti áskeri maqsatta paidalanýdyń qarqyndy damýy, ólimge ákeletin avtonomdy qarý júieleriniń (LAWS) jappai óndirisi jáne olardy paidalanýdy naqty retteýdiń joqtyǵy siiaqty halyqaralyq turaqtylyqqa qatysty máseleler kúsheie túsken.
Sondai-aq ol UQShU-nyń uiymǵa múshe memleketterdiń qaýipsizdigin qamtamasyz etý boiynsha tiisti sharalar qabyldap jatqanyna sendirdi.
