Jambyl oblysy Qordai aýdanynda bolǵan oqiǵa saldarynan shamamen 1 milliard 7 million teńge shyǵyn kelgen. Sarapshy mamandar úsh kún boiy múlikterdi sanap, zerttep, zerdelep osyndai qorytyndy shyǵardy. Endi bul materialdyq shyǵyn zańǵa sáikes shetinen tólenedi, dep habarlady "Habar-24".
Biraq ol úshin turǵyndardyń qujattary túgel bolýy kerek. Bul baǵytta mobildi halyqqa qyzmet kórsetý ortalyqtary jergilikti jerde jumys istei bastady.
Rýslan Baqytbekuly, tilshi:
- Armysyzdar! Mine mynaý Sortóbe aýyly ákimdiginiń ǵimaraty. Mamandar turǵyndardy osy jerde qabyldaidy. Tańǵy saǵat 9-dan keshki 19:00-ge deiin úzilissiz jumys isteidi. Qazir qoldarynda múlik iesi ekenin rastaityn qujaty joq adamdar bar.
Turǵyndardyń aitýlarynsha, kópshiligi qujattaryn janjal kezinde joǵaltqan. Olardyń qujattary talapqa sai bolmasa ótemaqy tolyq berilmeidi.
Qazir tótenshe jaǵdai kezinde zardap shekken azamattarmen jumys jasaý maqsatynda arnaiy toptar qurylǵan.
Jurtqa yńǵaily, ári qoljetimdi bolý úshin Masanshy, Sortóbe, Bular batyr eldi mekenderinde jyljymaly halyqqa qyzmet kórsetý ortalyǵy jumys istep tur. Mamandar jurttyń ótinishin tirkep, osy jerde qabyldaidy.
Búgingi kúnge deiin 22 azamatqa jeke kýálik, 18 balaǵa týý týraly kýálikter berilgen.
