– Qordaıdaǵy oqıǵa boıynsha bes adam ustaldy. Buzaqylyq, qart adamdy uryp-soǵý jáne polıseıge baǵynbaý isi boıynsha ustalǵan. Bul aqparat quraldarynda keńinen qamtyldy. Órteý, adam óltirý faktileri boıynsha tergeý jalǵasyp jatyr. Ázirge eshkim ustalǵan joq. Sebebi onda materıal kóp, – dedi Dembaev.
Onyń aıtýynsha «barlyq vıdeomaterıaldar zerttelgennen keıin sheshim qabyldanady».
7 aqpan keshke Jambyl oblysy Qordaı aýdanynda qazaqtar men dúngender janjaldasyp, resmı derek boıynsha, 10 adam qaza taýyp, 180-nen asa adam zardap shekken. Keıin janjal bolǵan Masanchı aýylynda qıraǵan ǵımarattan taǵy bir adamnyń múrdesi tabylyp, polısıa onyń janjaldan qaza bolǵanyn rastady.
Qordaıdaǵy janjal kezinde Qyrǵyzstanmen shekaraǵa jaqyn ornalasqan, negizinen etnıkalyq dúngender turatyn Masanchı, Sortóbe, Aýqatty aýyldarynda, resmı málimet boıynsha, 20 saýda orny men 39 úı búlinip, 47 kólik órtendi. Úkimet qaqtyǵysta qıraǵan úıler men saýda oryndaryn qalpyna keltirýge kómektesetinin málimdegen.
Bılik janjal qart er adamnyń jaralanýymen aıaqtalǵan jol ústindegi kıkiljińnen shyqqan dep málimdedi. Kıkiljińnen soń qazaqtar (kóbi – Qarakemer aýylynyń turǵyny) jınalyp, dúngender turatyn aýyldarǵa barǵan.
Qazaqstan úkimeti janjalǵa baılanysty 120-dan astam qylmystyq is qozǵalǵanyn málimdedi. ("Adam óltirý" baby boıynsha 11 is). Qordaıdaǵy janjaldan soń Jambyl oblysynyń ákimi Asqar Myrzahmetov bastaǵan birneshe sheneýnik jáne polısıa departamentiniń basshysy qyzmetten ketti. Onyń ornyna sol kezde premer-mınıstrdiń orynbasary bolǵan Berdibek Saparbaev taǵaıyndaldy.
1 naýryzda Qordaı aýdanyna barǵan prezıdent Qasym-Jomart Toqaev zańsyz kontrabandamen aınalysqan eki qylmystyq toptyń arasyndaǵy teketiresten janjal shyqqanyn, sonyń kesirinen 11 adam qaza bolǵanyn aıtyp, jergilikti bılikke para alý men shekara arqyly zańsyz saýda jasaý máselelerin sheshýdi tapsyrdy.
