Túrkistan oblysynda 2,1 mln adam turatyn 800-den astam eldi mekenniń 361-i qoqys shyǵarý qyzmetimen qamtylǵan. Aýdan, qalalar aýmaǵynda 151 qatty turmystyq poligon orny belgilengen. Onyń 32-si aýdandyq turǵyn úi-kommýnaldyq sharýashylyq salasyna jaýapty bólimge, 76-sy aýyl ákimderiniń jáne 43-i senimgerlik basqarýǵa berilgen. Zerdeleý jumystarynyń nátijesinde oblystaǵy 151 poligonnyń 71% talaptarǵa sáikes kelmeitindigi anyqtaldy.
Qoqys poligondary máselesi Túrkistan oblysy ákimi apparatynyń aptalyq májilisinde arnaiy talqylandy. Óńir basshysy Darhan Satybaldy jaýaptylarǵa tiisti tapsyrmalar berdi.
– Aýdan, qala ákimdikteri men jaýapty basqarma usynǵan derekterde alshaqtyq bar. Naqtylap, shynaiy aqparatty usynyńyzdar. Qatty turmystyq qallyq tastaityn poligondardyń bári sanitarlyq talapqa sai ári sapaly bolýy tiis. Tutas zerdelep, qadaǵalańyzdar. Qoqysty óńdeý boiynsha tiisti jumystar atqarylsyn, – dedi Darhan Satybaldy.
Túrkistan oblystyq tabiǵi resýrstar jáne tabiǵat paidalanýdy retteý basqarmasynyń basshysy Qairat Abdýalievtyń aitýynsha, oblys ákimimen Túrkistan oblysy aýmaǵyndaǵy qatty turmystyq qaldyqtar tastaityn poligon oryndaryn ońtailandyrý jáne talapqa sáikestendirýdiń 3 jyldyq jospary ázirlenip, bekitilgen. Alaida aýdan, qala ákimdikterimen osy kúnge deiin jumys júrgizilmegen.
Oblys aýmaǵynda turǵyndar sanynyń kóbeiýine bailanysty, qatty turmystyq qaldyqtar kólemi de artyp keledi. 2024 jyldyń 5 aiynda qoqystardy qaita óńdeý úlesi 22,2%-ǵa jetip otyr.
Jyl qorytyndysymen mejeni 26%-ǵa jetkizý josparlanǵan. Qazyǵurt, Otyrar, Shardara, Báidibek, Keles aýdandary aýmaǵynda qoqystardy suryptaý nemese qaita óńdeý kásiporyndary bolmaǵandyqtan qoqystardy qaita óńdeý kórsetkishin oryndaý kúmán keltirýde.
2023 jyly QR Ekologiia, geologiia jáne tabiǵi resýrstar ministrliginiń «Qazaqstan Ǵarysh Sapary» UQ» AQ arqyly oblys aýmaǵynda ǵaryshtan túsirilim jasalyp, eldi mekender aýmaǵynda qatty turmystyq poligonnyń syrtynda bei-bereket qoqystar tastalǵan 414 núkte anyqtalǵan.
Al 2024 jyly 19 núkte anyqtalyp otyr, qazirgi ýaqytqa tazalanǵany – 3. Iaǵni, turǵyndar eldi meken aýmaǵynda zańsyz ári turaqty túrde qoqys tastaýdy jalǵastyrýda. Bul máseleni sheshý boiynsha da mindet júkteldi.
QR Prezidenti Q.Toqaevtyń 7 aqpanda ótken keńeitilgen májilisinde «investorlardy tarta otyryp, iri qalalarda turmystyq qatty qaldyqtardy qaita óńdeý zaýyttaryn salýdy jandandyrý» tapsyrmasy berilgen.
Qaldyqtardy jinaýdan bastap, olardy suryptaýmen ainalysatyn merdilger mekemelerge sýbsidiialaý tetikteri men nesielendirý «Jasyl Damý» AQ-y qarjysy esebinen qarastyrylǵan. Oblystan búgingi kúnge 14 joba maquldanǵan.
Májiliste oblys ákimi osy jumystardy jandandyrý, qoqystardy turaqty bei-bereket tastaityndarǵa tiisti aiyppul salý, tazalyqty saqtaý boiynsha úgit-nasihat jumystaryn jandandyrý, zańsyz ári talapqa sai kelmeitin qoqys poligondaryn retteý jóninde tapsyrma berdi. Bul jumysty durys atqarmasa, aýdan, qala, aýyl ákimderi men jaýapty basqarma basshylaryna tiisti shara kóriletini eskertildi
