Búgin Qonaev qalasynda Almaty oblystyq «Dostyq úii» ǵimaratynyń qurylysy bastaldy. Óńirdegi qoǵamdyq kelisim men etnosaralyq tatýlyqty nyǵaitýǵa baǵyttalǵan mańyzdy jobany jergilikti iri kásipkerler óz qarajaty esebinen júzege asyrýda. Shara barysynda oblys ákimi Marat Sultanǵaziev pen QR Parlamenti Senatynyń depýtaty Janbolat Jórgenbaev oblystyq etnomádeni birlestikterdiń tóraǵalarymen birge ǵimarattyń irgetasyna ýaqyt kapsýlasyn saldy, dep habarlaidy dalanews.kz.
Saltanatty rásimge oblystyq máslihat depýtattary, basqarma basshylary, ziialy qaýym ókilderi men kásipkerler, etnomádeni birlestikterdiń, aqsaqaldar men analar keńesiniń músheleri, Qoǵamdyq kelisim jáne damý ortalyǵynyń qyzmetkerleri qatysty. Qazirgi tańda óńirde 105 etnos ókili tatý-tátti ómir súrýde. Oblysta tirkelgen 34 etnomádeni birlestik pen qoǵamdyq uiym túrli áleýmettik jobany qolǵa alyp, ózara tatýlyq pen senimdi arttyrýǵa qyzmet etýde. Sondyqtan bul «Dostyq úii» atalǵan qurylymdardyń basyn biriktiretin qara shańyraqqa ainalmaq. Munda olardyń nátijeli jumys isteýine barlyq jaǵdai jasalyp, jastar bastamalaryn qoldaýǵa, pikir almasýǵa, mádeni jáne qoǵamdyq jobalardy júzege asyrýǵa múmkindik beretin zamanaýi orta qalyptasady.
Aimaq basshysy óz sózinde «Dostyq úii» qurylysynyń bastalýy oblys úshin tarihi mańyzy zor, aitýly oqiǵa ekenin atap ótti.
«Memleket basshysy Qasym-Jomart Toqaev Qazaqstan halqy Assambleiasynyń 2025 jyly ótken HHHIV sessiiasynda kópetnosty Almaty oblysynda «Dostyq úiin» salý qajettigi jóninde naqty tapsyrma bergen bolatyn. Búgin sol mańyzdy tapsyrmanyń júzege asýyna kýá bolyp otyrmyz. Ózderińizge belgili, memleket tarapynan oblysymyzdyń áleýmettik-ekonomikalyq damýyna árdaiym airyqsha qoldaý kórsetilip keledi. Sonyń nátijesinde óńirimizde kásipkerlik pen óndiristiń órkendeýine mol múmkindikter ashyldy. Atap aitqanda, 2022–2025 jyldar aralyǵynda Almaty oblysyna 3,7 trln teńge investitsiia tartyldy. Jalpy quny 930,3 mlrd teńge bolatyn 120 joba paidalanýǵa berilip, onyń aiasynda 14 myń jańa jumys orny quryldy. Osy múmkindikterdi tiimdi paidalanyp, óńir ekonomikasynyń órkendeýine eleýli úles qosqan kásipkerlerimiz búgin «Dostyq úiin» óz qarajattary esebinen salýǵa qoldaý bildirý arqyly el aldyndaǵy azamattyq jaýapkershiliktiń joǵary úlgisin kórsetip otyr. Bul shańyraq el birligi men tatýlyqtyń ordasyna ainalady dep senemin», – dedi Marat Eleýsizuly.
«Assambleia jastary» respýblikalyq qoǵamdyq birlestiginiń Almaty oblysy boiynsha tóraǵasy Vera Pletneva jańa ǵimarat jańa múmkindikterge jol ashatynyn jetkizdi.
«Búgin bárimiz tarihi sáttiń kýási bolyp otyrmyz. Qazirgi tańda Qazaqstan 100-den astam etnos ókilin bir shańyraq astyna biriktirip, shynaiy dostyqtyń jarshysy bolyp otyr. «Birlik bar jerde tirlik bar» dep beker aitylmaǵan. Bizdiń basty maqsatymyz – tatýlyqty tý etip, elimizdiń damýyna úles qosý. Al Almaty oblysynda «Dostyq úiiniń» boi kóterýi bizdiń jumysymyzǵa serpin berip, jańa belesterdi baǵyndyrýǵa septigin tigizedi. Ásirese Assambleia jastaryna úlken úmit pen jiger syilaidy», – degen ol oblys ákimdigi men jobaǵa uiytqy bolǵan kásipkerlerge alǵys aitty.
Nysan 2 qabatty, 1 bloktan turady. Joba boiynsha etno-mádeni ortalyqtar men birlestikter kabinetteri, 56 oryndy konferents-zal, 300 oryndy májilis zaly salynady. Sondai-aq ǵimarat aldyna biiktigi 92 metr bolatyn Tý tuǵyr ornatylady. Nysan qurylysy úsh ai boiy júrgizilip, jyl sońyna deiin paidalanýǵa beriledi.
