Búgin Qonaev qalasynyń ákimi Ashat Berdihanov jańa jaǵajaidy qoldanysqa berý rásimine qatysty.
«Alǵa qoiylǵan mańyzdy baǵyttyń biri – týrizm salasyn damytý. Búgingi tańda Qonaevta 140 demalys nysany qyzmet etýde. 2023 jyly shomylý maýsymynda 1,2 mln. týrister kelse, biyl 1,3 mln. demalýshyǵa qyzmet kórsetý josparlanyp otyr.
Qalada týrizmdi damytý maqsatynda biýdjet tarapynan da, jeke investorlar tarapynan da tiisti jumystar júrgizilýde.
Búginde 5-qalalyq jaǵajai abattandyrylyp, qala turǵyndary men qonaqtaryna qoldanysqa berilip otyr. Qýanyshty kúnmen barshańyzdy shyn júrekten quttyqtaimyn!» – dedi Ashat Berdihanov.
Jaǵajaiǵa kirý quny – bir kólikke 1000 teńge. Nysan biýdjet qarjysyna salynǵan.
Atalǵan jaǵajaidyń jalpy aýmaǵy 2,7 gektardy quraidy. Munda fýtbol, volleibol, vorkaýt, balalar oiyn alańdary, ústel tennisi ornatylǵan. Sýǵa túsý orny men dárethana, shatyrlar, pirs, jasyl aimaq, biznes obektileri, balalar basseini, avtoturaq ta bar.
Budan bólek, qaladaǵy №6 jáne №7 jaǵajailardy abattandyrý kózdelýde. Al №8 jaǵajai investorlar qarjysyna salynyp, attraktsiondar parkine ainalmaq.
