Aıtýly sharaǵa elimizdiń túkpir-túkpirinen ǵalymdar men zertteýshiler, zıaly qaýym ókilderi jáne qoǵam qaıratkerleri, el aǵalary men jastar qatysty.
Qonaqtar «Alty alashtyń Alataýy» atty kitap kórmesin jáne «Ońtústikfılm» mekemesiniń derekti fılmin tamashalady.
Túrkistan oblysynyń ákimi Darhan Satybaldy kórnekti memleket qaıratkeri týraly oı qozǵap, konferesnıa jumysyna sáttilik tiledi.
– Qazaq halqynyń jarqyn bolashaǵy úshin aıanbaı eńbek tulǵalardyń biri – Dinmuhamed Ahmetuly Qonaev. Parasaty bıik tulǵa ultqa qyzmet etýdiń úlgisin kórsete bildi. Kórkem minezimen, qarapaıym bolmysymen, ańyzǵa aınalǵan adaldyǵymen el júreginde máńgi qaldy. Joǵary jaýapkershilik pen tereń biliminiń arqasynda ónege bolǵan eńbek jolynda halyqtyń qolaıly ómir súrýine múmkindik týdyrdy.
Sol ýaqyttarda da bizdiń óńirge de ózgeshe serpin berip, ıgilikti ister atqardy. Dinmuhamed Ahmetuly Túrkistanǵa kelgen saıyn Iasaýı kesenesine baryp Quran baǵyshtaýdy ádetke aınaldyrǵan. Búgingi Túrkistandy damytý jumystary sol ýaqyttardaǵy qasıetti qalamyzǵa degen erekshe qamqorlyqtyń zańdy jalǵasy dep bilemin. Sondyqtan bul sharanyń qasıetti qalamyzdyń tórinde ótýi, – zańdylyq dedi Darhan Satybaldy.
Konferensıany eńbek ardageri Ismat Tursynqulov júrgizip otyrdy. Jıynda qoǵam qaıratkeriniń memleketti damytý jolynda atqarǵan isteri, azamattyq bolmysy keńinen sóz boldy.
Belgili jýrnalıs, «Qonaevtanýshy» Oraz Qaýǵabaev «Dinmuhamed Ahmetuly Qonaevtyń on eki qasıeti jáne Qonaevty ulyqtaýdyń joldary» taqyrybynda baıandama jasady. Tulǵanyń adaldyǵy, qoly men ary taza bolǵanyna toqtalyp, qaıratkerdiń týǵan kúni jáne ómirden ótken kúnine oraı eske alý jáne tanymdyq is-sharalar ótkizýdi usyndy.
QR Memlekettik syılyǵynyń ıegeri, ekonomıka ǵylymdarynyń doktory, akademık Orazaly Sábden Dinmuhamed Ahmetulynyń ınjenerler men ǵalymdar, jumysshylar legin daıarlap shyǵýdaǵy eren eńbegin atap ótti. Kóshbasshy atynda memlekettik syılyq taǵaıyndalsa degen usynysyn jetkizdi.
Al D.A.Qonaevtyń keńesshisi bolǵan, genaral-leıtenant Amankeldi Shabdarbaev Dımash atanyń qazaq qalamgerlerine, rýhanıatyna, jastaryna qorǵan bolǵany týraly tyń derekterdi tilge tıek etse, ózge de eńbek ardagerleri men qatysýshylar estelikter aıtty. Elge kóshbasshy bolǵan azamattyń el esinde máńgi saqtalatynyna senim bildirdi.
Jıynda Halyqaralyq D.Qonaev qoǵamdyq qorynyń prezıdenti Eldar Qonaev birneshe azamatqa D.Qonaevtyń 110 jyldyǵyna arnalǵan ordendi tapsyrdy.
Túrkistan tórindegi keleli májiliste aıtylǵan túrli usynystar men kóterilgen bastamalar konferensıanyń hattamasyna engizildi.
