ايتۋلى شاراعا ەلىمىزدىڭ تۇكپىر-تۇكپىرىنەن عالىمدار مەن زەرتتەۋشىلەر، زيالى قاۋىم وكىلدەرى جانە قوعام قايراتكەرلەرى، ەل اعالارى مەن جاستار قاتىستى.
قوناقتار «التى الاشتىڭ الاتاۋى» اتتى كىتاپ كورمەسىن جانە «وڭتۇستىكفيلم» مەكەمەسىنىڭ دەرەكتى ءفيلمىن تاماشالادى.
تۇركىستان وبلىسىنىڭ اكىمى دارحان ساتىبالدى كورنەكتى مەملەكەت قايراتكەرى تۋرالى وي قوزعاپ، كونفەرەسنيا جۇمىسىنا ساتتىلىك تىلەدى.
– قازاق حالقىنىڭ جارقىن بولاشاعى ءۇشىن ايانباي ەڭبەك تۇلعالاردىڭ ءبىرى – دىنمۇحامەد احمەت ۇلى قونايەۆ. پاراساتى بيىك تۇلعا ۇلتقا قىزمەت ەتۋدىڭ ۇلگىسىن كورسەتە ءبىلدى. كوركەم مىنەزىمەن، قاراپايىم بولمىسىمەن، اڭىزعا اينالعان ادالدىعىمەن ەل جۇرەگىندە ماڭگى قالدى. جوعارى جاۋاپكەرشىلىك پەن تەرەڭ ءبىلىمىنىڭ ارقاسىندا ونەگە بولعان ەڭبەك جولىندا حالىقتىڭ قولايلى ءومىر سۇرۋىنە مۇمكىندىك تۋدىردى.
سول ۋاقىتتاردا دا ءبىزدىڭ وڭىرگە دە وزگەشە سەرپىن بەرىپ، يگىلىكتى ىستەر اتقاردى. دىنمۇحامەد احمەت ۇلى تۇركىستانعا كەلگەن سايىن ياساۋي كەسەنەسىنە بارىپ قۇران باعىشتاۋدى ادەتكە اينالدىرعان. بۇگىنگى تۇركىستاندى دامىتۋ جۇمىستارى سول ۋاقىتتارداعى قاسيەتتى قالامىزعا دەگەن ەرەكشە قامقورلىقتىڭ زاڭدى جالعاسى دەپ بىلەمىن. سوندىقتان بۇل شارانىڭ قاسيەتتى قالامىزدىڭ تورىندە ءوتۋى، – زاڭدىلىق دەدى دارحان ساتىبالدى.
كونفەرەنسيانى ەڭبەك ارداگەرى يسمات تۇرسىنقۇلوۆ جۇرگىزىپ وتىردى. جيىندا قوعام قايراتكەرىنىڭ مەملەكەتتى دامىتۋ جولىندا اتقارعان ىستەرى، ازاماتتىق بولمىسى كەڭىنەن ءسوز بولدى.
بەلگىلى جۋرناليست، «قونايەۆتانۋشى» وراز قاۋعابايەۆ «دىنمۇحامەد احمەت ۇلى قونايەۆتىڭ ون ەكى قاسيەتى جانە قونايەۆتى ۇلىقتاۋدىڭ جولدارى» تاقىرىبىندا بايانداما جاسادى. تۇلعانىڭ ادالدىعى، قولى مەن ارى تازا بولعانىنا توقتالىپ، قايراتكەردىڭ تۋعان كۇنى جانە ومىردەن وتكەن كۇنىنە وراي ەسكە الۋ جانە تانىمدىق ءىس-شارالار وتكىزۋدى ۇسىندى.
ق ر مەملەكەتتىك سىيلىعىنىڭ يەگەرى، ەكونوميكا عىلىمدارىنىڭ دوكتورى، اكادەميك ورازالى سابدەن دىنمۇحامەد احمەت ۇلىنىڭ ينجەنەرلەر مەن عالىمدار، جۇمىسشىلار لەگىن دايارلاپ شىعۋداعى ەرەن ەڭبەگىن اتاپ ءوتتى. كوشباسشى اتىندا مەملەكەتتىك سىيلىق تاعايىندالسا دەگەن ۇسىنىسىن جەتكىزدى.
ال د.ا.قونايەۆتىڭ كەڭەسشىسى بولعان، گەنارال-لەيتەنانت امانكەلدى شابداربايەۆ ديماش اتانىڭ قازاق قالامگەرلەرىنە، رۋحانياتىنا، جاستارىنا قورعان بولعانى تۋرالى تىڭ دەرەكتەردى تىلگە تيەك ەتسە، وزگە دە ەڭبەك ارداگەرلەرى مەن قاتىسۋشىلار ەستەلىكتەر ايتتى. ەلگە كوشباسشى بولعان ازاماتتىڭ ەل ەسىندە ماڭگى ساقتالاتىنىنا سەنىم ءبىلدىردى.
جيىندا حالىقارالىق د.قونايەۆ قوعامدىق قورىنىڭ پرەزيدەنتى ەلدار قونايەۆ بىرنەشە ازاماتقا د.قونايەۆتىڭ 110 جىلدىعىنا ارنالعان وردەندى تاپسىردى.
تۇركىستان تورىندەگى كەلەلى ماجىلىستە ايتىلعان ءتۇرلى ۇسىنىستار مەن كوتەرىلگەن باستامالار كونفەرەنسيانىڭ حاتتاماسىنا ەنگىزىلدى.
