Astanada «Ádilet» partiiasynyń quryltai sezi bastaldy, dep habarlaidy dalanews.kz.
Astanada jańa saiasi uiym – Ádilet partiiasynyń quryltai sezi óz jumysyn bastady. Jiynǵa Qazaqstannyń barlyq óńirinen kelgen myńǵa jýyq delegat qatysyp jatyr.
Sezd aiasynda partiianyń Jarǵysy men baǵdarlamasyn bekitý, sondai-aq jetekshi organdaryn aiqyndaý josparlanǵan. Osylaisha, partiia Qazaqstan zańnamasyna sáikes resmi qyzmetin bastaýǵa qajetti negizgi rásimderdi ótkizýde.
Ádilet ózin jańa konstitýtsiialyq qundylyqtarǵa negizdelgen saiasi uiym retinde tanystyrdy. Partiianyń negizgi ustanymdary retinde ádildik, otanshyldyq, jaýapkershilik, eńbekqorlyq jáne damý ataldy.
Partiia baǵdarlamasynda «Zań men tártip» qaǵidaty ádiletti qoǵamnyń basty negizi ekeni aitylǵan. Sondai-aq uiym Qazaqstanda kez kelgen adal eńbek ádil ári laiyqty baǵalanýy tiis dep esepteidi.
Baǵdarlamada densaýlyq saqtaý, bilim, ǵylym, mádeniet jáne kreativti indýstriialardy damytýǵa erekshe nazar aýdarylǵan. Partiia meditsina salasynda esep úshin emes, adam densaýlyǵyna baǵyttalǵan model qalyptastyrý qajet ekenin málimdedi.
Sonymen qatar, Ádilet óńirlerdiń teńgerimdi damýyn qoldap, ár aimaqqa ortalyq tarapynan ádil kóńil bólinýi kerek degen ustanymdy alǵa tartýda.
Halyqaralyq saiasatta partiia Qazaqstandy jahandyq qaishylyqtardy teń ustai alatyn jaýapty orta derjava retinde nyǵaitýdy kózdeidi.
Partiia saiasi jaýapkershiliktiń jańa standartyn engizýdi usynyp otyr. Atap aitqanda, árbir partiia sailaýshylar aldynda baǵdarlamasyndaǵy ár tarmaq pen ýáde boiynsha turaqty túrde jariia esep berip otyrýy tiis dep sanaidy.
Sondai-aq partiia músheligine ótinim berý men qoǵamdyq bastamalardy usynýǵa arnalǵan tsifrlyq platformasyn iske qosqany habarlandy.
Eske salsaq, 15 sáýirde bastamashyl top jańa partiia qurý týraly málimdegen bolatyn. Al 16 sáýirde Qazaqstan Respýblikasy Ádilet ministrligi tiisti habarlamany qabyldaǵanyn rastaǵan.
Partiia ókilderiniń málimetinshe, qazirgi tańda uiym quramynda 9812 múshe bar. Osylaisha, zańda kórsetilgen keminde 5000 músheden turatyn talap oryndalǵan.
