Qonaev qalasynyń ákimi Ashat Berdihanov «Jylý ortalyǵy» mekemesine baryp, jylytý maýsymyna daiyndyq barysymen tanysty. Mekeme basshysy Ońǵarbek Mahambetov qala jylytý maýsymyna 85 paiyz daiyn ekenin aitty. №2 jáne №4 qazandyq aǵymdaǵy jóndeýden ótip, sý jylytatyn №9 qazandyqqa reviziia jasalǵan, – dep habarlaidy Dalanews.kz Almaty oblysy ákiminiń baspasóz qyzmetine silteme jasap.
– Ortalyqta 10 qazandyq bar. Onyń tórteýi sý jylytqysh, altaýy bý qazandyqtary. Qazir sý jylytqysh 1 qazandyq qana jumys istep tur, 3-eýi rezervte. Bý qazandyǵynyń bireýi jóndeýden ótýde, al bireýi jumys jasaýda, 4-eýi rezervte tur, – dedi mekeme basshysy.
Qalada ortalyqtandyrǵan jylýǵa 31 myńnan astam abonent qosylǵan. Úidegi temperatýranyń tómendigine bailanysty ótinishterdiń 70 paiyzy qaralyp, páter ieleri kooperativterimen tyǵyz jumys atqarylýda. Qazir №1,2,3,4 sh/a-daǵy kópqabatty úilerdiń jertólelerindegi qondyrǵylar tazalanyp jatyr.
– 12 tamyzdan bastap jabdyqtardy tekserý maqsatynda shaharǵa ystyq sý berý toqtatylady. Munyń barlyǵy qystan aman-esen shyǵý úshin jasalyp jatqanyn turǵyndar túsinýi qajet, – dedi Ońǵarbek Mahambetov.
Sonymen qatar ol №2,4,5 shaǵyn aýdandarynyń jylý jelilerin aýystyryp jatqan merdiger kompaniianyń isi týraly aitty. Sózinshe, sot sheshimi jaqyn arada shyǵady. Sodan keiin konkýrs qaita oinatylady. Merdiger anyqtalǵan soń, atalǵan jelini qazan aiynyń sońyna deiin iske qosý josparlanýda.
Qala ákimi Ashat Berdihanov bolsa, nysandy jańǵyrtý jobasyn tezdetip jasaýdy tapsyrdy.
Mamandar halyqqa páterdegi terezelerdi jylylap, qubyrlar men radiatorlardy ýaqytyly tazalaýǵa keńes beredi.
