Qazaqstanda arnaiy prokýrorlar qyzmetiniń eks-basshysy Olesia Kekselge qatysty qylmystyq is qozǵaldy, dep habarlaidy Dalanews.kz.
Qazaqstan Bas prokýratýrasy arnaiy prokýrorlar qyzmetiniń burynǵy basshysy Olesia Kekselge qatysty qylmystyq is qozǵalǵanyn rastady, dep habarlaidy agenttik tilshisi.
«Qazaqstan Respýblikasynyń Bas prokýratýrasy 2025 jylǵy 4 shildede Qylmystyq kodekstiń 146-baby 2-bóligi 1 jáne 2-tarmaqtarynda (azaptaý) kózdelgen qylmysty jasady degen kúdikpen Ulttyq sybailas jemqorlyqqa qarsy qyzmettiń tergeý departamenti basshysynyń burynǵy orynbasary Keksel O.I.-ny kúdikti retinde tanydy. Qazirgi ýaqytta sotqa deiingi tergeý jalǵasýda, qosymsha dálelderdi jinaýǵa baǵyttalǵan tergeý áreketteri júrgizilýde», – dep habarlady dúisenbi kúni KazTAG redaktsiiasyna Bas prokýratýranyń baspasóz qyzmeti.
Olesia Keksel Ulttyq biýronyń (qazirgi Sybailas jemqorlyqqa qarsy qyzmet) burynǵy basshysy Talǵat Tatýbaevpen birge, Ekonomikalyq jáne sybailas jemqorlyq qylmystaryna qarsy kúres agenttigin (ABEKQ, burynǵy qarjy politsiiasy) basqarǵan Qairat Qojamjarovtyń eń senimdi serikteriniń biri sanalady.
Aita keteiik, Antikordyń eks basshysy (Ulttyq biýro) Talǵat Tatýbaevtyń ustalýymen Nigmatýllin-Qojamjarov klany tolyqtai kúiretilip, óz ómirin toqtatty. "Jańa Qazaqstan" senator Qairat Qojamjarovtyń alqymyna bir taban jaqyndai tústi.
DALA INSIDE derekkóziniń sózinshe "Parlamenttegi ókilettiligi bitkennen keiin Qairat Perneshulynyń ómiri qiyndai túsedi". Tatýbaevtyń túrli tapsyrmalaryn eki etpei, rezonansti isterdiń shoqpar tergeýshisi bolǵan Olesia Keksel de jaqyn arada ustalýy tiis. Ol da azaptaýǵa qatysty qylmystyq is orbitasynda júrgen.
"Keksel kóptegen yqpaldy klandardyń aiaǵyn basqan adam. Onyń istegen isterin eshkim umytqan joq. Shaǵyn zań buzýshylyqtary bar, aitarlyqtai qatelikteri bar, bári jipke tizilýde. Kóp adam tergeýge kómekteskisi keledi. Kekseldiń ústinen kýáger bolǵysy keletinder az emes", - deidi derekkóz.Al Tatýbaevti ardager jýrnalist Seiitqazy Mataevtyń kiesi urdy. Tipti Nazarbaev ta prezident kezinde Mataevty kýǵyndaýdy quptamaǵan bolatyn. Biraq Nurlan Nigmatýllin boi bermei qoiǵan. Aqyry Tatýbaevtar ákeli-balaly Mataevtardy jazyqsyz qýdalap, túrmege toǵytty. Mataevtar óz kinásin moiyndaǵan joq. Artynan olardy "Jańa Qazaqstan" tolyǵymen aqtap shyqty.
Belgili jýrnalist Áset Mataev azaptaý baby boiynsha ustalǵan burynǵy general Talǵat Tatýbaevqa qatysty óziniń basynan ótken oqiǵany eske alyp, feisbýkta jazba qaldyrǵan. Onyń sózinshe, 2016 jyly ol qarjy politsiiasy basshysynyń orynbasary Talǵat Tatýbaevpen eki ret kezdesken. Sol kezde finpol ókili Mataevtar otbasyna Qylmystyq kodekstiń 65-baby (kinásin moiyndap, shyn ókingeni úshin jaýapkershilikten bosatý) boiynsha kináni moiyndaýdy usynǵan.
«Sol kezde ákem ekeýmizge jalǵan aiyp taǵylyp jatqanyn aittym. Logikalyq argýmentterimdi estigende, onyń kózi jypylyqtap ketti. Sol sátte onyń «zań adamy» emes, qarapaiym kóshe adamy siiaqty sóilep turǵanyn túsindim. Áńgimesiniń bar mazmuny – «joǵarydan tapsyrys tústi, báribir túrmege jabylasyńdar» degenge saidy», – dep eske alady Áset Mataev.Jýrnalistiń aitýynsha, sol is boiynsha birneshe tanymal tulǵa – Joǵarǵy sottyń sol kezdegi baspasóz hatshysy Bolat Kalianbekov (qazirgi Májilis apparaty basshysynyń orynbasary), «Qazaqtelekomnyń» vitse-prezidenti Mahanbetajiev, Aqparat komitetiniń burynǵy tóraǵasy Bersebaev sekildi sheneýnikter qamaýǵa alynǵan. Biraq olar qysymǵa tótep bere almai, bir kún tergeý izoliatorynda otyrǵan soń, qarjy politsiiasy qoiǵan sharttarǵa kelisken.
«Olardyń barlyǵy bir-bir kún tergeý izoliatorynda bolyp, bizge jala jabýǵa májbúr boldy. Is júzinde bilik pen finpoldyń talabyna kóngen adamdar edi. Olardyń birazy Nurlan Nyǵmatýlin, Baǵlan Mailybaev, Baýyrjan Baibek, Asqar Jumaǵaliev sekildi tulǵalarǵa jaqyn adamdar bolatyn», – dep jazdy jýrnalist.Sondai-aq ol Joǵarǵy sottyń sol kezdegi baspasóz hatshysy Bolat Kalianbekovtiń keiinirek belgili quqyq qorǵaýshy, «Ádil sóz» qorynyń jetekshisi Tamara Kaleevaǵa habarlasyp, Mataevtardy kináni moiyndaýǵa kóndirýin suraǵanyn atap ótti. Mataevtyń aitýynsha, Kalianbekovtyń ústinen qozǵalǵan is 2021 jyly Qańtar oqiǵasynyń aldynda jabylyp qalǵan.
«Men ol kezde otbasym men jaqyndarymnyń qysymǵa ushyraǵanyna kýá boldym. Ákemdi qamaýǵa alyp, keiin maǵan telefon arqyly shyǵyp, «eshteńege ýaiymdama, is jabylady, bári shiki ekenin biledi» dep sendirdi. Árine, sózine turmady. Ákemdi de, otbasymdy da, qyzmetkerlerimizdi de úkimge deiin qinady», – deidi ol.Áset Mataev ákesiniń túrmeden shyqqan soń, mediaforýmda «Tengriniýs» jetekshisi Batyr Qazybaevtyń kelip, keshirim suraǵanyn da aitty. Qazybaev aqparat quralynda Mataevtarǵa qarsy materialdar shyǵarý týraly tapsyrmany joǵarydan alǵanyn moiyndaǵan.
Jýrnalist bul jazbany kek alý maqsatynda emes, quqyq qorǵaý organdarynyń qyzmetkerleri óz bolashaǵyn oilansyn degen nietpen jariialaǵanyn atap ótti.
Tatýbaev ózi qurýǵa kómektesken sistemanyń qurbany boldy. Kekseldi de, Qojamjarovty da osyndai taǵdyr kútip tur.
