Máselen, 2021 jyldyń qyrkúiegindegi málimetter boiynsha, elimizde 249 osyndai qoǵamdyq keńes jumys isteidi eken, onyń ishinde jergilikti deńgeidegisi – 216.
Al olardyń jumysy óz tiimdiligin tanytyp jatyr ma?
Qalyń buqaranyń osyndai qoǵamdyq keńesterge tartylý deńgeii qandai? Bul rette Dalanews tilshisi saraptama agenttikteriniń, resmi organdardyń zertteýlerin alǵa tartady.
Al olardyń qorytyndysy, ókinishke qarai, asa kóńil kónshitip otyrǵan joq.
Kóptegen elde qalyń buqara qoǵamdyq institýttardyń damyǵan júiesi arqyly memlekettik basqarý isine qatysady.
Qazaqstanda bul fýnktsiiany qoǵamdyq keńes atqaratyny aitylady. Iaǵni, teoriialyq turǵydan azamattyq qoǵam ókilderinen turatyn ári biliktiń barlyq deńgeidegi qyzmetin baqylaýǵa arnalǵan konsýltativtik-keńesýshi organ.
– Mundai qurylym memlekettik apparatty basqarýshy taptyń múddelerine qyzmet kórsetetin tetikke ainaldyrýǵa múmkindik bermei, memleketti turaqtylyqpen qamtamasyz etýi tiis. Biraq, barlyǵymyz kýá bolyp otyrǵanymyzdai, is júzinde elimizde múldem basqa jaǵdai qalyptasqan, – deidi bul rette saiasattanýshy Dáýren Sákenuly.
Finprom sarapshylarynyń zertteýine sáikes, Qazaqstanda tek úsh aimaqta qoǵamdyq keńester týraly aqparattan halyqtyń qanyqtyǵy qanaǵattanarlyq deńgeide. Al bul búkil eldiń 10 paiyzyn ǵana quraidy.
Halyqtyń memlekettik basqarý isine qatysý institýttary týraly málimetten maqurym óńir Qaraǵandy oblysy bolyp shyqty.
Munda saýalnamaǵa qatysqan respondentterdiń 82%-y qoǵamdyq keńes jaiynan múldem habarsyz. Atyraý jáne Qostanai oblystary da alysqa kete qoimapty, mundaǵy respondentterdiń 79,5% jáne 76,2%-y "bul qyzmet týraly eshteńe bilmeimin" degen jaýap bergen.
El damýyndaǵy basty qalalar – Astana men Almaty da úmitti aqtamady. Qos astanada qoǵamdyq keńesterdiń bary týraly suralǵandardyń teń jartysy bilmeitin bolyp shyqty.
Qorytyndylai kelgende, qazaqstandyqtardyń sanasynda qoǵamdyq keńester týraly uǵym nyq ornyqpaǵan, biraq fakt boiynsha olar elimizde qarqyndy jumys istep jatyr.
2021 jyldyń qyrkúiegindegi málimet boiynsha, bizde 249 qoǵamdyq keńes jumys istepti, onyń ishinde jergilikti deńgeidegisi – 216.
Jalpy, Qazaqstanda qoǵamdyq keńester 2016 jyldan beri jumys istep keledi, biraq olar nemen ainalysatynyn, bar-joǵynan kópshiliktiń basym bóligi bile bermeidi.
Sondai-aq, QR Sybailas jemqorlyqqa qarsy is-qimyl agenttigi 2021 jylǵy ulttyq baiandamasynda da qoǵamdyq keńesterdiń tiimdiligi tómen dep baǵa beredi.
Osy jaǵynan alǵanda, eger ákimdikter halyqty memlekettik basqarý júiesine tartý boiynsha óz kózqarasyn ózgertpese, Prezident jaqynda jariialaǵan "Jańa Ádiletti Qazaqstan" jobasy "Qazaqstan – 2050" baǵdarlamasy sekildi kúi keshý táýekeli joǵary. Budan shyǵatyn qorytyndy: biýdjetter igeriledi, "ortalyqtandyrylǵan josparly ekonomika" qalyptaspaidy, sáikesinshe, ádettegidei, shyǵyndar halyqtyń moinyna artylýy múmkin.
