QMDB elimizde betti tumshalaityn kiimge tyiym salynýyna bailanysty málimdeme jasady, dep habarlaidy Dalanews.kz.
Búginde elimizde qoǵamdyq qaýipsizdikti qamtamasyz etý, azamattardyń quqyqtary men bostandyqtaryn qorǵaý maqsatynda birqatar zańnamalyq ózgerister engizilýde. Sonyń biri – bet-álpetin tolyq jabatyn kiimge (onyń biri niqab) qoǵamdyq oryndarda tyiym salý týraly jańa shekteýler.
"Bul sheshim qandai da bir dini senimdi nemese jeke tańdaýdy shekteý úshin emes, eń aldymen qoǵamdyq qaýipsizdikti qamtamasyz etý qajettiliginen týyndap otyr. Qazirgi tańda álemniń kóptegen elderi, onyń ishinde musylman elderi de qaýipsizdik maqsatynda osyndai ustanymdy qabyldaýda", - delingen jaýapta.
Quran aiattary men hadiste baiandalǵandai áiel kisiler bet-júzin jabýǵa nemese búrkemeleýge mindettelmegen.
"Bul halqymyzdyń dástúrinde de kórinis tappaǵan. Biz elimizdegi musylmandardyń birtutas dini birlestigi retinde, qoǵamdaǵy turaqtylyq, yntymaq pen birlikti basty qundylyqtarymyzdyń biri dep baǵalaimyz. Islam dini de qoǵammen jarasymdy ómir súrýdi, tártipke baǵynyp, memlekettiń tynyshtyǵyna úles qosýdy nasihattaidy. Sondyqtan da zańǵa túsinistikpen qarap, ortaq igilik jolynda birligimizdi bekemdeiik", - deidi QMDB ókilderi.
Eske salaiyq, 30 maýsymnan bastap Qazaqstanda bet-júzdi búrkeitin kiim kiiýge tyiym salyndy.
Tyiym salý normasy "Qazaqstan Respýblikasynyń keibir zańnamalyq aktilerine quqyq qorǵaý qyzmetin, quqyq qorǵaý jáne arnaiy memlekettik organdar, azamattyq qorǵaý organdary men áskeri qyzmetshilerdiń turǵyn úimen qamtamasyz etilýi men áleýmettik qorǵalýyn jetildirý, sondai-aq ishki ister organdary qyzmetindegi artyq zańnamalyq retteýdi alyp tastaý máseleleri boiynsha ózgerister men tolyqtyrýlar engizý týraly" zańǵa engizildi.
