Sot saraptamalary ortalyǵynyń basshysy Rýslan Satyvaldievke biýdjet qarajatyn jymqyrdy degen aiyp taǵylyp otyr. Al urlanǵan qarajat nashaqorlyqpen kúreske arnalǵan memlekettik baǵdarlama aiasynda jabdyq satyp alýǵa bólingen. Bul týraly QR Ádilet ministri Erlan Sársembaev úkimettegi brifing barysynda málimdedi, dep habarlaidy Dalanews.kz.
"Qazirgi tańda naqty somany atai almaimyn, sebebi kúdikti áli kináli dep tanylǵan joq. Alaida bul qarajat sot saraptamalary ortalyǵyna qajetti jabdyq satyp alý úshin, nashaqorlyqpen kúreske baǵyttalǵan memlekettik baǵdarlama aiasynda bólingen", – dedi ministr.
Erlan Sársembaevtyń aitýynsha, 2024 jyly osy memlekettik baǵdarlamaǵa 3,8 mlrd teńge bólingen.
Eske salaiyq, buǵan deiin Qarjylyq monitoring agenttigi Ádilet ministrliginiń Sot saraptamasy ortalyǵynyń basshysy Rýslan Satvaldievtiń ustalǵanyn resmi túrde rastady. Bul týraly QMA tóraǵasynyń orynbasary Jeńis Elemesov málimdedi.
"Bizdiń óndiriste bul is bar. Ol qarajatty jymqyrý jáne ysyrap etý boiynsha kúdikke ilindi. Qazirgi tańda oǵan qatysty bultartpaý sharasy retinde qamaýǵa alý sanktsiiasy qoldanyldy. Qalǵan málimetterdi jariialai almaimyn. Jymqyrý somasy ártúrli bolýy múmkin", - dedi Elemesov májilis kýlýarynda jýrnalisterge bergen suhbatynda.
Buǵan deiin jýrnalist Mihail Kozachkovtyń Telegram-arnasynda Satvaldievke qatysty respýblikalyq biýdjetten bólingen milliardtaǵan qarjyny jymqyrý kúdigi boiynsha qylmystyq is qozǵalǵany týraly aqparat taraǵan bolatyn. Atalǵan qarajat psihotroptyq jáne esirtki zattaryna saraptama júrgizýge arnalǵan jabdyqtar satyp alýǵa bólingeni aitylǵan.
Qazirgi tańda tergeý amaldary jalǵasyp jatyr. QMA ókilderi istiń mán-jaiyn tolyq jariialaýdan bas tartqanymen, qoǵamda bul oqiǵa úlken rezonans týdyryp otyr.
