Qyzmetkerlerdiń quqyǵy basty nazarda
Kún tártibinde jumys berýshi mekemelerdiń eńbekkerlerge jalaqy boiynsha qaryzdary, óndiristik jaraqat jáne jazataiym oqiǵalar men olardyń aldyn alý, jalaqysy tómen eńbekkerler jalaqysynyń mólsherin arttyrý, áleýmettik eńbek qatynastaryn tsifrlandyrý, ujymdyq shart qabyldaý, biznestiń áleýmettik jaýapkershiligi syndy máseleler qozǵaldy.
Jiyndy ashyp, oǵan qatysýshylardy kún tártibindegi máselemen jáne oblys ortalyǵynan kelgen qonaqpen tanystyryp ótken Á.Balqybekov sóz kezegin B.Narbaevqa berdi. Ol óz sózinde joǵaryda atalǵan máseleler tóńiregindegi aýdannyń ahýalyn baiandady. Sonymen qatar, biznestiń áleýmettik jaýapkershiligin arttyrý máselesin de nazardan tys qaldyrmai, bul tusta aýdandyq áleýmettik eńbek qatynastaryn retteý jónindegi úsh jaqty komissiianyń róli erekshe ekendigin atap ótti. Sondai-aq, osydan eki jyl buryn qolǵa alynǵan turǵyndardyń mártebesin anyqtaý jumystarynyń durys júrgizilmeýi áleýmettik eńbek qatynastarynyń shielenisýine óz yqpalyn tigizip otyrǵany da aityldy. Óitkeni, ol kelesi jyly qoldanysqa engiziletin mindetti meditsinalyq saqtandyrý boiynsha tólemaqy tóleýde basty negizge alynbaq. Jumys berýshi men jumysshy arasyndaǵy kelisimsharttyń oryndalmaýy da jii kezigetin jait bolyp otyr. Tipti, dámhana, meiramhanada jumys jasaityn bolsa da kelisimsharttyń bolýy qajettigi zańda kórsetilse de, kóp jaǵdaida oǵan mán berilmeidi. Al, bul óz kezeginde eńbek qatynastarynyń buzylýyna alyp keldi. Jiyn barysynda ustaz mártebesin kóterý máselesi de qozǵaldy. Bul jóninde oblys ortalyǵynan kelgen qonaq ustazdar arasyndaǵy kópbalaly analarǵa qoldaý kórsetý, ujymdyq shartqa kópbalaly analar boiynsha ózgeris engizý máseleleri aldaǵy shilde aiynda ustaz mártebesi týraly zań qoldanysqa engiziletin bolsa, sol kezde taǵy da naqtylana túsetinin jetkizdi. Óitkeni, ustazdyń áleýmettik qorǵalýy sapaly bilimniń kepili ekendigin basta nazarda ustaý kózdelgen.
Kelesi kezekte aýdan ákimdiginiń jumyspen qamtý jáne áleýmettik baǵdarlamalar bóliminiń basshysy G.Kerimbaeva, aýdandyq bilim mekemeleri kásipodaq komitetiniń tóraiymy A.Bekmýrzina kún tártibindegi máseleler tóńireginde óz salalary boiynsha júrgizilgen jumystar jóninde málimdedi.
