Qyzylorda oblysynyń ákimi Nurlybek Nálibaevtyń qatysýymen «Óner ortalyǵynda» «XXI ǵasyrdyń qarjylyq triggerleri» taqyrybynda forým ótti. Forýmǵa Qyzylorda qalasy men aýdan ákimderi, jaýapty sala basshylary, bilim, densaýlyq saqtaý, mádeniet, sport salalarynyń mamandary, ziialy qaýym, belsendi jastar uiymdarynyń ókilderi qatysty,- dep habarlaidy Dalanews.kz
Aimaq basshysy qoǵamdaǵy kúrdeli máselelerdi talqylap, aldaǵy birlesken mańyzdy mindetterdi aiqyndaý maqsatynda atqarylatyn jumystarǵa toqtaldy.
«Tsifrlyq sheshimder jyldam damyǵan ýaqytta azamattarymyzdyń quqyqtaryn qorǵaýdyń, qarjylyq saýattylyǵyn, quqyqtyq mádenietin qalyptastyrýdyń mańyzy artty.
Prezidentimiz Qasym-Jomart Kemeluly halyqqa arnaǵan Joldaýynda: «Bizdiń qoǵamymyzda zań men tártip ústemdik qurýǵa tiis. Bul – búkil qoǵamnyń, ár adamnyń qaýipsizdigin qamtamasyz etýge qatysty eń basty talap. Biz sonda ǵana Ádiletti, Taza, Qaýipsiz Qazaqstandy qura alamyz», - dep naqty mindetterdi belgilegen bolatyn.
Biyl 1 sáýirde Úkimet qaýlysymen «Qoǵamda zań men tártip ideologiiasyn ilgeriletý jónindegi 2025 - 2030 jyldarǵa arnalǵan tujyrymdama» bekitilip, naqty mindetter belgilendi. Óńirimizde Memleket basshymyzdyń «Zań men Tártip» qaǵidasyn iske asyrýda Qyzylorda oblysy boiynsha ekonomikalyq tergep-tekserý departamentimen birlesip, keshendi sharalardy qolǵa aldyq. Jańa bastamalarǵa árdaiym qoldaý kórsetip kelemiz.
Zamanaýi múmkindikterdi óz paidasyna asyrǵan alaiaqtar jasaǵan qylmystar azamattardyń laiyqty ómir súrýine teris áser etip jatyr. Túrli gadjet men smartfondaǵy baǵdarlamalardyń kómegimen jasalatyn alaiaqtyq, kibershabýyldar shemasy sát saiyn ózgerip, qadamdary jańaryp barady. Halyqtyń qarjylyq qaýipsizdigi úshin qarjylyq piramidalar, qumar oiyndarǵa táýeldilik, internet-alaiaqtyq, dropperlik qylmystardyń aldyn alýda ýaqytyly, tiisti sheshimder qabyldaýdyń mańyzy artty. Bir qaraǵanda jeke adamnyń máselesi sekildi kórinýi múmkin. Bul – tutas qoǵamǵa, árbir otbasyǵa, urpaǵymyzdyń bolashaǵyna áser etetin qaýip-qater.
Biz ashyqtyq qaǵidatyna sáikes, qala, aýdandarda halyqtyń ózekti máseleleri boiynsha quqyq qorǵaý organdarynyń birinshi basshylarymen birge qoǵamdyq qabyldaýlardy turaqty ótkizip kelemiz. Bul óz kezeginde turǵyndardyń memlekettik organdarǵa degen senimin arttyryp, ádiletti qoǵam qurýǵa oń yqpal etti. Elimizde zańsyz oiyn biznesi men lýdomaniiaǵa qarsy is-qimyl jónindegi zań qabyldanyp, keshendi sharalarǵa jol ashyldy. Bul keselmen halyq, áleýmet bolyp kúresýimiz kerek. Lýdomaniia dertine shaldyqqan adammen psihologtar, din mamandary jumys istep, jeńil jolmen kelgen aqsha paida ákelmeitinin, tek adal eńbekpen tapqan tabystyń ǵana berekesi bolatynyn uǵyndyrýymyz qajet. Búgingi forýmda usynylǵan tyń ideialar men jańa bastamalar júieli iske ulasyp, naqty nátijelerge bastaidy dep senemin. Forým jumysyna sáttilik tileimin! - dedi N.Nálibaev.
Basqosýda Qyzylorda oblysy boiynsha ekonomikalyq tergep-tekserý departamenti basshysynyń orynbasary Rýslan Satybaldiev, dintanýshy Nurlan Asanov, aitysker aqyn Muhtar Niiazov, Qyzylorda oblysy boiynsha ekonomikalyq tergep-tekserý departamentiniń basshysy Aslan Keńes baiandama jasap, qarjylyq saýattylyqtyń mańyzyna toqtaldy. Qoǵam dertine ainalǵan qumar oiynǵa áýestiktiń qaýipti ekenin aitty.
Is-sharada oblys turǵyndarynyń qarjylyq saýattylyǵyn arttyrý, qarjy piramidalary men lýdomaniiaǵa qarsy kúrestiń aldyn alý baǵytynda belsendi ári nátijeli eńbek etken azamattar oblys ákiminiń Alǵys hatymen marapattaldy.
