Memleket basshysynyń bastamasymen «Taza Qazaqstan» respýblikalyq ekologiialyq baǵdarlamasy aiasynda Syr óńirinde sanitarlyq tazalyqty saqtaý, abattandyrý jáne turǵyndardyń ómir súrýine qolaily jaǵdai jasaý baǵytynda aýqymdy jumystar atqarylýda,- dep habarlaidy Dalanews.kz
Biýdjet qarajatymen qatar, kásipkerlerdiń demeýshiligimen ortalyq alańdar, saiabaqtar men demalys oryndary, oiyn jáne sport alańdary qaita jańǵyrtylyp, turǵyn úiler men áleýmettik nysandar zamanaýi úlgide jóndelýde.
Qazirgi tańda Qyzylorda qalasyndaǵy Prezident jáne Densaýlyq saiabaqtarynyń aýmaǵy birtutas keshen retinde jańǵyrtylýda. Aýmaǵyna halyq suranysyna sai avtokólik turaǵy salynyp, gúlzarlarmen kómkeriledi. Kólemi 64,5 gektar bolatyn bul keshende jaiaý júrginshiler men velosiped joldary, ashyq sahna, sporttyq alańdar, balalar oiyn aimaqtary, demalys oryndary men kóleńkeli pavilondar salynýda. Bir sózben aitqanda qala turǵyndary men qonaqtary úshin jaily ári qaýipsiz orta qalyptasady.
Qalalyq mádeniet jáne demalys parki qaita jańǵyrtýdan ótip, jańa kelbetke ie boldy. Munda jańa arka ornatylyp, «Syr batyrlary» eskertkishi Taǵzym alańyna aýystyryldy. Qorshaýlar men júrginshiler joly jańartylyp, 544 túp aǵash pen qylqan japyraqty kóshetter otyrǵyzyldy. Budan bólek, skeitpark, vorkaýt alańdary, balalar oiyn aimaqtary, fýd-korttar jáne ashyq amfiteatr salyndy.
Qala ortalyǵyndaǵy Qorqyt ata memorialdy alleiasyn qaita jańǵyrtý jumystary qarqyndy júrýde. Jalpy aýmaǵy 38 myń sharshy metrden asatyn demalys ornyndaǵy jasyl jelek alańy ulǵaitylyp, halyqtyń saialy ornyna ainalatyn bolady. Balalarǵa arnalǵan oiyn jáne sport alańdary zamanaýi jabdyqtarmen qamtamasyz etilip, qaýipsiz ári qolaily etip jasalýda. Búginde qurylys jáne abattandyrý jumystarynyń 65 paiyzy aiaqtalǵan.
Táýelsizdiktiń 25 jyldyǵy dańǵyly boiyndaǵy Syrdariia jaǵalaýyn abattandyrý jáne bekitý jumystary da belsendi júrgizildi. Joba aiasynda 6,7 shaqyrym jaǵalaýda tireý qabyrǵalary nyǵaitylyp, jol keńeitildi. Qaita jańǵyrtý jumystary aiasynda joldyń negizi jańartylyp, asfalt tóseldi. Syrdariia ózeni boiyndaǵy 1,4 shaqyrym qorǵanys bógeti tolyqtai tazartylyp, 1,4 shaqyrym tireý qabyrǵasy turǵyzyldy. Buǵan qosa, burynǵy eki jolaqty jol tórt jolaqty bolyp, eni 14 metrge deiin keńeitildi.
Jol boiynda 8 balalar oiyn alańy men sporttyq qural-jabdyqtar ornatylyp, turǵyndardyń bos ýaqytyn tiimdi ótkizýine jaǵdai jasaldy. Jaǵalaý aimaǵy abattandyrylyp, serýendeýge qolaily infraqurylym ornatyldy. Dańǵyl tek injenerlik turǵydan ǵana emes, estetikalyq jaǵynan da jańardy. Jol jiegi túrli-tústi boiaýlarmen kómkerilip, kóz tartarlyq sýrettermen bezendirilgen.
Ári qarai dańǵyldyń jalǵasy retinde Ábilqaiyr han kóshesinen Salamatov kóshesine deiin 2,9 shaqyrym jańa jol qurylysy júrgizilýde. Bul baǵytta da ózen boiyndaǵy qorǵanys bógeti kúsheitiledi. Tórt jolaqty avtojolmen qatar, eni 3 metrlik jaiaý júrginshiler joly salynady.
Qalanyń ekologiialyq kelbetin jaqsartý jáne turǵyndardyń ómir súrý sapasyn arttyrý baǵytyndaǵy jumystarmen QR Parlamenti Senatynyń depýtattary Rýslan Rústemov pen Naýryzbai Baiqadamov tanysyp shyqty.
