Qyzylorda oblysynyń ákimi, oblystyq Qazaqstan halqy Assambleiasynyń tóraǵasy Nurlybek Nálibaevtyń tóraǵalyǵymen Qazaqstan halqy Assambleiasynyń 30 jyldyǵyna orai keńeitilgen keńes ótti. Basqosýǵa jaýapty sala basshylary, qala, aýdan ákimderi men ziialy qaýym ókilderi, QHA músheleri qatysty, dep habarlaidy Dalanews.kz
Aimaq basshysy Assambleia qyzmetiniń mańyzdylyǵyn aityp, óńirdegi aýqymdy is-sharalarǵa toqtaldy.
«Barshańyzdy bereke-birligimizdiń uiytqysyna ainalyp, elimizdegi etnosaralyq dostyq pen birliktiń úlgisin álemge tanytqan Qazaqstan halqy Assambleiasynyń 30 jyldyq merekesimen quttyqtaimyn. Osy jyldar ishinde Assambleia halqymyzdy birlikke, dostyqqa úndeitin jalpyulttyq kelisimniń negizine ainaldy.
Óńirimizde sońǵy jyldary mańyzdy jobalar júzege asyrylýda. Qurylys qarqyn alyp, el igiligi úshin áleýmettik nysandar boi kóterýde. Áleýmettik-ekonomikalyq kórsetkishterimiz kún sanap ósip keledi.
Búginde barlyq aýdandaǵy «Rýhaniiat ortalyqtarynda» eldiń yntymaǵyn nyǵaitýǵa baǵyttalǵan mańyzdy jobalar iske asyrylýda. Ortalyqtardaǵy «Qoǵamdyq kelisim» kabinetteri etnos ókilderiniń mádeni-rýhani biregeiligin damytýǵa múmkindik beredi.
Assambleianyń mereili jylynda barshamyz úshin qýanyshty jańalyq – Qyzylorda qalasynda jańa «Dostyq úii» salynady. Ǵimarat jyl sońynda el igiligine tabystalady. Bul aimaq jurtshylyǵynyń birligi men yntymaǵyn nyǵaitýǵa atsalysqan etnomádeni birlestikterge arnalǵan, barlyq qajettiliktermen qamtamasyz etilgen zamanaýi ǵimarat bolady», – dedi N. Nálibaev.
Otyrysta oblystyq qoǵamdyq damý basqarmasynyń basshysy Rýslan Kaiýpov, oblystyq Qazaqstan halqy Assambleiasy tóraǵasynyń qoǵamdyq negizdegi orynbasary Dilfýra Bairaqtarova, Assambleia janyndaǵy ǵylymi-sarapshylyq toptyń jetekshisi Aitjan Orazbaqov, ardager Asylbek Jumabaev sóz sóilep, aimaqtaǵy jetistikterdi atap ótti.
Basqosýda Memleket basshysynyń 2025 jylǵy 8 sáýirdegi Jarlyǵyna sáikes Qazaqstan halqy Assambleiasynyń 30 jyldyǵyna arnalǵan merekelik medal tabystaldy. Óńirdiń áleýmettik-ekonomikalyq damýyna úles qosqan azamattar marapat tórinen kórindi.
Aita keteiik, búginde óńirimizde 30-dan astam etnos ókilderi turady. Jerlesterimiz Syr óńiriniń ekonomika, mádeniet, sport, bilim, ǵylym salalarynyń damýyna atsalysyp, elimizdiń órkendeýine úles qosýda.
Tatýlyq pen kelisimniń kieli shańyraǵyna ainalǵan «Dostyq úiinde» 11 etnomádeni birlestikke arnalǵan kabinetter qarastyrylǵan. Qazaqstan halqy Assambleiasynyń 30 jyldyǵyna orai keshendi is-sharalar jospary bekitilgen. Josparǵa sáikes 100-den astam is-shara uiymdastyrylady. Árbir etno-mádeni birlestiktiń onkúndigi ótkizilip, ulttyq-mádeni qundylyqtar nasihattalady.
