Resei prezidenti Vladimir Pýtin Ýkraina tarapynan soǵys qimyldaryn shekteýge qatysty jańa usynystar túskenin málimdedi, dep habarlaidy dalanews.kz.
Kreml jeksenbi kúni keshke Resei memlekettik telearnasynyń jýrnalisi Pavel Zarýbinge bergen Pýtinniń suhbatyn jariialady. Jýrnalist Ýkrainamen kelissózder týraly surap, buǵan deiin Roman Abramovichtiń araǵaiyndyǵymen kelissóz uiymdastyrý áreketin eske saldy.
Pýtinniń aitýynsha, Resei men Ýkraina arasynda birneshe baǵyt boiynsha bailanys saqtalǵan.
«Iá, bailanystar bar jáne olar birneshe baǵyt boiynsha jolǵa qoiylǵan. Munda eshqandai qupiia joq», – dedi ol.
Sonymen qatar Resei prezidenti buǵan deiin aitylǵan bastamalardan bólek jańa usynystardyń da bolǵanyn jetkizdi. Onyń aitýynsha, Ýkraina eki máseleni kótergen.
Birinshisi – eki eldiń bir-biriniń aýmaǵynyń tereńdigine soqqy jasaýdy ózara toqtatýy. Ekinshisi – áskeri is-qimyldardy tórt óńirmen ǵana shekteý. Olar: Donetsk, Lýgansk, Zaporoje jáne Herson oblystary.
Pýtin bul usynystardy Ýkraina armiiasynyń álsireýimen bailanystyrdy. Onyń sózinshe, Reseidiń soqqylary «áldeqaida qýatty ári joiqyn», al Ýkraina Qarýly kúshteri jeke quram tapshylyǵyna tap bolǵan.
Sonymen birge Pýtin bul usynystardyń ózin qanaǵattandyrmaitynyn aitty.
«Ýkraina Qarýly kúshterinde jeke quramnyń apatty tapshylyǵy jaǵdaiynda olar muny ózderi úshin qutqarý dep sanaityn shyǵar. Biraq Kiev rejimin qutqarý bizdiń josparymyzǵa kirmeidi. Degenmen qarsy taraptan túsetin árbir usynysqa muqiiat qaraimyz», – dedi Resei prezidenti.
Osydan keiin Pýtin Resei áskeriniń maidandaǵy áreketteri týraly aityp, Batys elderi Ýkraina armiiasynyń jetistikteri jóninde málimdep júrgenine toqtaldy. Onyń pikirinshe, eger Ýkraina shynymen de jańa aýmaqtardy baqylaýyna alyp, jeńiske jetip jatsa, onda Batysqa atysty toqtatý nemese beibit kelissózder týraly aitýdyń qajeti joq. Pýtin Resei áskeri alǵa qoiylǵan maqsattarǵa jetý úshin áskeri operatsiiany jalǵastyratynyn málimdedi.
