Qyzylorda oblysynda naýryz aiyndaǵy merekelerdi keń kólemde atap ótý maqsatynda túrli is-sharalar jospary bekitildi. Bul týraly oblys ákiminiń orynbasary Shahmardan Baimanov brifingte baiandady,- dep habarlaidy Dalanews.kz Qyzylorda oblysy ákimdiginiń baspasóz qyzmetine silteme jasap.
Naýryz aiyndaǵy merekeler tek tabiǵattyń jańarýy men kóktemniń kelýin atap ótýmen shektelmeidi. Bul merekeler halyq arasynda dostyqty, syilastyqty jáne birlikti nyǵaitýǵa, elimizdiń mádeni murasyn saqtaýǵa baǵyttalǵan. Naýryz aiynda ótkiziletin árbir mereke ózinshe mańyzdy jáne tereń maǵynaǵa ie.
Kóktemniń alǵashqy merekesi Alǵys aitý kúni - biyl Qazaqstan halqy Assambleiasynyń qurylǵanyna 30 jyl tolýymen qatar kelip otyr.
"Birlik pen yntymaqtastyqqa 30 jyl» aidarymen biz qazaqylyqtyń qaimaǵy buzylmaǵan Syr óńiriniń myzǵymas birligi men árbir azamattyń Otanǵa degen máńgilik súiispenshiligin odan ári ulyqtaýymyz qajet. Merekelik is-sharalar 25 aqpan – 2 naýryz aralyǵynda uiymdastyrylady. Apta kóleminde oblys boiynsha 200-ge jýyq keshendi is-sharalar oblys ortalyǵymen qatar, aýdandarda jáne barlyq eldi mekenderde ótkiziledi. Negizgi is-sharalar 1 naýryz kúni Dostyq úiinde Qazaqstan halqy Assambleiasynyń 30 jyldyǵyna arnalǵan taqtanyń ashylý saltanatynan bastaý alady. Odan ári aimaq basshysynyń qatysýymen salattanatty is-shara, gúl shoqtaryn qoiý rásimi, «Qaiyrymdylyq qorjyny» aktsiiasy uiymdastyrylady", - dedi oblys ákiminiń orynbasary.
8-naýryz Halyqaralyq áielder kúnin merekeleýdiń qalyptasqan dástúri aiasynda oblys kóleminde 173 is-shara ótkizilmek. Jumysshy mamandyqtarǵa basymdyq berile otyryp, barlyǵy 50-ge jýyq názik jandar qatysatyn aimaq basshysynyń merekelik qabyldaýy 7 naýryzǵa belgilengen.
Byltyrdan beri elimizde «Naýryz meiramyn atap ótýdiń tujyrymdamasy» qabyldanǵan. Soǵan sáikes Naýryznama onkúndigi 14-23 naýryz aralyǵynda ótedi.
"Biyl da Naýryznama onkúdiginde ár kúnge arnaiy taqyryptar bekitildi. Osy baǵytta oblys kóleminde 103 is-shara josparlansa, onyń 38-i oblystyq deńgeide ótkiziledi. 14 naýryz – «Kórisý kúni - Amal merekesi» atap ótýden «Naýryz» meiramyn toilaý bastaý alady. 15 naýryz – «Qaiyrymdylyq kúni», 16 naýryz – «Mádeniet jáne ulttyq salt-dástúr kúni», 17 naýryz – «Shańyraq kúni», 18 naýryz – «Ulttyq kiim kúni», 19 naýryz – «Jańarý kúni», 20 naýryz – «Ulttyq sport kúni», 21 naýryz – «Yntymaq kúni», 22 naýryz – «Jyl basy», 23 naýryz – «Tazarý kúni» naýryznamanyń qorytyndy kúni jalpyulttyq ekologiialyq aktsiia uiymdastyrylyp, «Tazalyq estafetasy» bastalady", - dedi oblys ákiminiń orynbasary.
