قىزىلوردا وبلىسىندا ناۋرىز ايىنداعى مەرەكەلەردى كەڭ كولەمدە اتاپ ءوتۋ ماقساتىندا ءتۇرلى ءىس-شارالار جوسپارى بەكىتىلدى. بۇل تۋرالى وبلىس اكىمىنىڭ ورىنباسارى شاحماردان بايمانوۆ بريفينگتە باياندادى،- دەپ حابارلايدى Dalanews.kz قىزىلوردا وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.

ناۋرىز ايىنداعى مەرەكەلەر تەك تابيعاتتىڭ جاڭارۋى مەن كوكتەمنىڭ كەلۋىن اتاپ وتۋمەن شەكتەلمەيدى. بۇل مەرەكەلەر حالىق اراسىندا دوستىقتى، سىيلاستىقتى جانە بىرلىكتى نىعايتۋعا، ەلىمىزدىڭ مادەني مۇراسىن ساقتاۋعا باعىتتالعان. ناۋرىز ايىندا وتكىزىلەتىن ءاربىر مەرەكە وزىنشە ماڭىزدى جانە تەرەڭ ماعىناعا يە.

كوكتەمنىڭ العاشقى مەرەكەسى العىس ايتۋ كۇنى - بيىل قازاقستان حالقى اسسامبلەياسىنىڭ قۇرىلعانىنا 30 جىل تولۋىمەن قاتار كەلىپ وتىر.

"بىرلىك پەن ىنتىماقتاستىققا 30 جىل» ايدارىمەن ءبىز قازاقىلىقتىڭ قايماعى بۇزىلماعان سىر ءوڭىرىنىڭ مىزعىماس بىرلىگى مەن ءاربىر ازاماتتىڭ وتانعا دەگەن ماڭگىلىك سۇيىسپەنشىلىگىن ودان ءارى ۇلىقتاۋىمىز قاجەت. مەرەكەلىك ءىس-شارالار 25 اقپان – 2 ناۋرىز ارالىعىندا ۇيىمداستىرىلادى. اپتا كولەمىندە وبلىس بويىنشا 200-گە جۋىق كەشەندى ءىس-شارالار وبلىس ورتالىعىمەن قاتار، اۋدانداردا جانە بارلىق ەلدى مەكەندەردە وتكىزىلەدى. نەگىزگى ءىس-شارالار 1 ناۋرىز كۇنى دوستىق ۇيىندە قازاقستان حالقى اسسامبلەياسىنىڭ 30 جىلدىعىنا ارنالعان تاقتانىڭ اشىلۋ سالتاناتىنان باستاۋ الادى. ودان ءارى ايماق باسشىسىنىڭ قاتىسۋىمەن سالاتتاناتتى ءىس-شارا، گۇل شوقتارىن قويۋ ءراسىمى، «قايىرىمدىلىق قورجىنى» اكسياسى ۇيىمداستىرىلادى"، - دەدى وبلىس اكىمىنىڭ ورىنباسارى.

8-ناۋرىز حالىقارالىق ايەلدەر كۇنىن مەرەكەلەۋدىڭ قالىپتاسقان ءداستۇرى اياسىندا وبلىس كولەمىندە 173 ءىس-شارا وتكىزىلمەك. جۇمىسشى ماماندىقتارعا باسىمدىق بەرىلە وتىرىپ، بارلىعى 50-گە جۋىق نازىك جاندار قاتىساتىن ايماق باسشىسىنىڭ مەرەكەلىك قابىلداۋى 7 ناۋرىزعا بەلگىلەنگەن.

بىلتىردان بەرى ەلىمىزدە «ناۋرىز مەيرامىن اتاپ ءوتۋدىڭ تۇجىرىمداماسى» قابىلدانعان. سوعان سايكەس ناۋرىزناما ونكۇندىگى 14-23 ناۋرىز ارالىعىندا وتەدى.

"بيىل دا ناۋرىزناما ونكۇدىگىندە ءار كۇنگە ارنايى تاقىرىپتار بەكىتىلدى. وسى باعىتتا وبلىس كولەمىندە 103 ءىس-شارا جوسپارلانسا، ونىڭ 38ء-ى وبلىستىق دەڭگەيدە وتكىزىلەدى. 14 ناۋرىز – «كورىسۋ كۇنى - امال مەرەكەسى» اتاپ وتۋدەن «ناۋرىز» مەيرامىن تويلاۋ باستاۋ الادى. 15 ناۋرىز – «قايىرىمدىلىق كۇنى»، 16 ناۋرىز – «مادەنيەت جانە ۇلتتىق ءسالت-داستۇر كۇنى»، 17 ناۋرىز – «شاڭىراق كۇنى»، 18 ناۋرىز – «ۇلتتىق كيىم كۇنى»، 19 ناۋرىز – «جاڭارۋ كۇنى»، 20 ناۋرىز – «ۇلتتىق سپورت كۇنى»، 21 ناۋرىز – «ىنتىماق كۇنى»، 22 ناۋرىز – «جىل باسى»، 23 ناۋرىز – «تازارۋ كۇنى» ناۋرىزنامانىڭ قورىتىندى كۇنى جالپىۇلتتىق ەكولوگيالىق اكسيا ۇيىمداستىرىلىپ، «تازالىق ەستافەتاسى» باستالادى"، - دەدى وبلىس اكىمىنىڭ ورىنباسارى.